Nimin lama tarlan tawh ang khan star footballer hlui Robinho chu Brazil ram lung inah pawngsual thubuai avangin dahluh a ni.
Italy rama Albanian hmeichhe pakhat pawngsual rawn thubuaiah Brazilian hi Italy court sang ber chuan thiamloh a chantir a, mahse, Brazil rama a haw hman avang leh Brazil sawrkarin ram danga an khua leh tui thubuai nei thawnchhuahna dan an neih loh avangin him angin a awm hman zet a, Italy court-in Brazil sawrkar hnenah an ram lung inah tal lo tantir tura a ngenna pawmin Brazilian federal police-te chuan Ningani khan manin, kum kua zet tang turin lung inah an khung ta a ni.
Santos, Real Madrid, Manchester City, AC Milan leh Brazil national team-a player langsar ni thin Robinho hi kum 2017 khan Milan court chuan kum 22 mi Albanian hmeichhe pawngsual rawn avangin Brazilian dang pangate nen thiamloh a chantir a, kum 2020-ah court chuan convict an nihna nemnghetin, kum 2022 khan Italy Supreme Court chuan case hi a tuaithar leh a, Brazil sawrkar hnenah ngenna thlenin, an ram lung inah Robinho a tang dawn ta a ni.
Albanian hmeichhia kha an hrairui a, an pawngsual rawn a, mahse, Robinho chuan hmeichhe duhdan anga sex hmang an nih thu a sawi.
Lung inah Robinho thawnliam ta nge nge
