Lung inah Sarma a la tang ngei dawn – Gandhi

Lung inah Sarma a la tang ngei dawn – Gandhi
Assam State Congress president atana Gaurav Gogoi-a ruat a nih hnua a vawi khat nana Leader of the Opposition Rahul Gandhi-a’n a tlawh hmasak berah Chief Minister Himanta Biswa Sarma-a chu a ei rukna leh thuneihna a hman sualna avangin engtik niah emaw chuan ‘Congress sakeibakneiten’ lung inah an la thawn dawn thu a sawi.
Nakuma assembly inthlan lo awm tur thlirin Gandhi-a hian Assam hi tlawhin Congress hian hmarchhak state lianah hian intihnun thar leh an tum hle.
An party hruaitu, MP, MLA leh worker-te nena Guwahati-a hun an hmanaah Gandhi-a hian worker-te fakin Assam-a ‘sakeibaknei nu leh pa’ an nih thu a sawi.
All India Congress Committee (AICC) President Mallikarjun Kharge-a leh Assam Congress chief thar, Gaurav Gogoi lawmpuiin Gandhi-a hian an party-a booth-level worker-te chu Assam hma hun atana an party tana beitu ber an nih thu a sawi.
“Vawiin hian eng rilru nge in put? Mi huaisen, Assam hma hun atana beitu turte in ni,” tiin kal khawmte chu hrilhin kutbeng thawm pawh a ring hle.
Gandhi-a hian Biswa chu sawiselin Assam chief minister hi ei ru-ah a puh a, lung in a la luh dawn thu a sawi a, Prime Minister Narendra Modi leh Home Minister Amit Shah te pawhin an chhan thei dawn lo tih a sawi.
“Hei hi Congress party an tih tur a ni lo. Assam-a thalai lo neitu, inhlawhfa le nun khaw chhuah beitu mipuite tih tur a ni a. A chhan chu heng mite hian he pa hi a ei ru tih an hre vek a ni,” a ti a. Sarma-a hian solar park leh resort-a chhuahin ni tin ram a ru thin niin a sawi bawk.
Sarma-a chu lal ang maia khawsain Assam ram leh hausaknate chu Adani leh Ambani ang chi corporate giant hnenah a pe mawlh mawlh niin a sawi bawk.
“Aw ring tak leh thawm na tak phenah hian hlauhna a awm thin a. Congress sakeibakneite hian engtik niah emaw chuan lung inah an dah dawn tih a hria a ni,” tiin Gandhi-a chuan a sawi a. Assam-a thil awm dan chu Maharashtra-a inthlanna tihkikawi dan leh Bihar-a voter list ennawn vel nen tehkhinin, Assam chu a dawt leh tur a nih thu a sawi.
Sarma chuan Gandhi-a thu sawi hi chhangin, “Ziakin, ‘Himanta Biswa Sarma hi lung inah a la awm dawn’ hei hi Leader of the Opposition, Pu Rahul Gandhi-a sawi ngei a ni,” tiin X-ah a tar lang.
Chief minister hian Gandhi-a chu he thil sawi tur hian Assam-ah a kal vang vang niin a sawi a, “He thu sawi tur hian Assam-ah a lo kal vang vang a, hetih mek lai hian amah hi ram chhung hmun hrang hrangah thubuai hrang hrangah bail-a chhuah mai mai a ni tih a intheihnghilh hlauh a ni,” a ti bawk.
Gandhi-a’n ei rua a puhna chungchangah hian Sarma chuan, “National Herald scam-ah Rs. vaibelchhe 5,000 chuang ei rukna thubuaiah bail-in a chhuak mek tih kan hria a. India-a Congress president tawh zinga ei ru nasa ber tia hriat reng i ni tawh dawn a. I thil sawi hian engmah keimahah danglamna a thlen lo, a chhan chu ka hria a, ramin a hria a, nang hi vawiina India-a hruaitu ei ru nasa ber tih hi an hria a ni,” a ti.
Nilainia Gandhi-a’n Assam a tlawhnaah hian Guwahati-ah Kharge-a nen an inkawm a. Assam Congress chief Gogoi-a chuan an party inrelbawlna chungchang leh inthlan lo awm tura chona awm hrang hrang an sawi dun tih a sawi.