National Health Mission hnuaia programme, Rastrya Bal Swasthya Karyakram (RBSK) leh Ebenezer Medical Centre thawh dunna in naupang lung natna neite tana buatsaih Congenital Heart Disease Screening Camp tum 6-na chu Ningani khan Ebenezer Medical Centre Chawnpui Aizawlah neih a ni. NHM Mizoram mission director Dr Eric Zomawia’n a hawng.
Hun kaihruaitu Health Services director Dr. Lalremmmawii chuan nausen atanga kum 18 inkar, lung na neite zawn chhuah a, a tul anga hma lakpui a ni chu lawmawm a tih thu a sawi a. RBSK programme kaltlanga naupang tam takin nun nuam leh hrisel zawk an neih phah theih nan duhsakna a hlan tih thu a sawi. Ebenezer Hospital medical director Dr Vanlalsiama chuan mite tana malsawmna thlentu ni tur leh lung natna avanga tanpuina mamawh ngawih ngawihte tana tangkai theia RBSK Programme nen an thawk dun chu lawmawm a tih thu a sawi ve bawk.
RBSK puihna in tun thlengin naupang 90 chuang lung zai ngaite hospital bill RBSK hian a tumsak tawh a. Kum kalta khan state pawn hospital-te nen tangtlangin screening camp tum 5 buatsaih a ni tawh. Heng screening camp-ah hian Ebenezer Medical Centre hian a lo pui tawh thin a, state pawn Bangalore leh Imphal lama RBSK puihnaa naupang lung zai tawhte chu an ni hian an lo enkawl chhunzawmsak thin a ni. Kumin hian Mizoram damdawi inah ngei, Mizo cardiologist (lung lam mithiam) Dr Vanlalmalsawmdawngliana hoin screening camp hi buatsaih a ni.
RBSK leh Ebenezer Medical Centre hian kumin January 25 khan thawh dunna thuthlung an ziak a. He inremna bawhzui hian ccreening camp hi buatsaih a ni. Naupang lung enkawl ngai thlanchhuahte hi Ebenezer Medical Centre-ah enkawl an ni anga, an inenkawlna senso hi RBSK, NHM Mizoram chuan a tumsak dawn a ni.
Hriat theih chinah screening camp-ah hian nau piang hlim atanga kum 18 inkar, lung lama harsatna nei, hmun hrang ami 186 chu echo screening tihsak an ni tawh a, registration ti an la awm zel bawk.
Lung natna nei naupang ho enkawl dan tur enfiah mek
