Lungawi lohna lantira badge dum bel Mizoram Govt Doctors Association (Mizoram Health Service) te’n sorkar ngaihchan an tum a, Thawhlehni-a badge dum bel leh an tum pawh an thulh. Sorkar din, Addl CS Chairman na hnuaia sorkar department hotu lawkte telna MHS Restructuring Committee-in kum khat kal taa rawtna (recommendation) a lo siam tawhte tun thlenga tihhlawhtlin a la nih loh avanga lungawi lovin sorkara thawk doctor-te hian July ni 10 leh ni 11-a badge dum bel an tum a, July ni 13-15 chhunga mass casual leave lak an tum bawk. Thawhtanni khan an hnathawhna hmunah badge dum an bel a, mahse thuneitu lam nena inbiain, sorkar ngaihchan rih an tum ta a ni.
Thawhtanni tukah deputy minister Tawnluia leh health minister Dr R Lalthangliana te’n Mizoram Govt Doctors Association (MGDA) hruaitute hi lengah an sawm a, sorkar hmalak mekna te lo hrilhin, tun thlaa cabinet meeting neih tura ngaihtuah tum a nih thu an lo hrilh.
Chawhnu lamah chief minister an hmu leh a, ani pawhin July thlaa cabinet meeting-a ngaihtuah tum a nih thu leh, a theih anga tihhlawhtlin tum a nih thu te sawiin, nawrh chhunzawm lo turin a lo ngen a ni.
“MGDA thil phut, sorkar Committee sangin recommendation a lo siam tawhte chu July thla chhung ngeia cabinet meeting-a ngaihtuah a, theihtawp chhuaha tihhlawhtlin an tum thu chief minister leh Dy CM leh health minister leh sorkar official te’n an sawi vek chu MGDA Executive Committee chuan rintlakah kan ngai a. Chuvang chuan black badge kan bel mek leh, ni 13 atanga mass casual leave lak kan tum chu MGDA chuan thulh lailawk rih ni se kan ti a. Sorkar thu ngaichang reng chungin hmalak dan tur kan ngaihtuah zui zel dawn a ni,” tiin MGDA chuan thuchhuah an siam.
MGDA hian Mizoram Health Service chungchangah phut neiin nikum February khan nawrh an lo tum tawh a, sorkarin February ni 17 khan a ngaihtuahtu tur committee dinin, thla thum chhunga rawtna thlen tura tih an ni. May thlaah rawtna an thlen ta a, MGDA thil phutte a kim lo chungin MGDA hian a hlawhtlin hun an nghak ta a ni.
MGDA hruaitute chuan an thil phut hi hlawh tihsanna tur lam a ni lo tiin an sawi a, sorkar tha tichak tura post siamrem te, thuneihna inkhaidiat dan siamthat te, post awm lova mihring awm sinaa post thar siam chungchang te a ni tiin The Aizawl Post an hrilh.
Committee rawtna tihhlawhtlin a nih chuan loh avangin nikum July khan nawrh an tum a, sorkar hotute’n nuar lo tura ngenin, August thla chhunga tihfel an tiam avangin an thulh a ni.
MGDA hruaitute chuan, kumin May thlaah khan cabinet meeting-ah ngaihtuah a ni a, sum sen ngai lo chin chauh pass a ni. Chumi hnuah post awm sa siamrem (convert) chu cabinet meeting-in rem a ti tia hrilh an ni a, mahse chutiang a lo ni lo niin an sawi. Chumi hnuah tihhlawhtlin a nih chuan loh avangin badge dum bel leh mass casual leave lak hi an rel ta tih an sawi bawk.
Lungawi loh vanga badge dum bel doctor te’n sorkar ngaihchan tum
