Lunglei-a State University dah tumnaah CM-in dawt a sawi tam – Leader of Opposition

Lunglei-a State University dah
tumnaah CM-in dawt a sawi tam
– Leader of Opposition
Lunglei-a Mizoram State University dah a nih leh zawk chungchangah chief minister chuan Lungleiah chawp leh chilhin dawt tam tak a sawi tih leader of opposition Lalchhandama Ralte chuan a sawi.
Thawhtannia Mizo Hnam Run inkhawmah MNF vice president ni bawk Lalchhandama Ralte chuan, MNF sawrkarin State University atan cabinet-in 2023 July 31 khan a rel a. Kumin August 16-ah Bill Drafting Committee din niin, ZPM sawrkar chuan Drafting Committee hi hma a lak tir a. Kumin March 4-ah bill hi pass a ni tih a sawi.
“MNF ministry kha draft stage-ah kan awm a, a hmun tur engmah a la awm lo. A hmunhma dahtu dik tak chu ZPM sawrkar an ni a, Aizawl-a dah tur an ti. Chief minister tih vek a ni a, Aizawl lamah ‘kan tih’ a ti a, Lunglei lamah ‘MNF tih’ a ti thung,” a ti.
Cluster institution ho MNF sawrkar thlan nia chief minister-in a sawi laiin, cluster college/ institute order hi kumin October 10-a chhuak chauh a ni tih a sawi. “H&TE minister hoin chak takin hma an la a, college an notify pawh minister hian a tlawh vek tawh. Lungleia University dah tur tih CM-in a va puan lai khan Aizawla university hmunhma tura ruatah an la hnatlang luih luih,” a ti.
Lunglei lamin University an dil laia a theih loh, titu ZPM sawrkar chuan, Aizawla dah tum chu MNF sawrkar tih vek tiin, Lunglei tana engmah ti duh loah MNF a puh let mek tih Lalchhandama Ralte hian a sawi a. Assembly House-a University bill an sawi khan ZPM MLA pakhatmahin Lungleia dah an dil lo a. Aizawla dah an thlawp thu leh MZSU Bill (Aizawl station) pass-tu nih an inchhuan thute an sawi a. Lungleiah awm rawh se titu chu opposition bench zawk an ni tih a sawi bawk.
“Zirna hi politicize lo turin ka ngen a. Lungleia State University dah tumna ni ‘tha ba rulhna’ mai mai ni loin, an duh tak tak a nih chuan ngaihtuahna fim takin ti se, kan thlawp ang. MZU Southern Campus kan neih theihnan MNF sawrkarin nasa takin hma kan la a. Pukpuiah ram acre 300 kan siam fel hman. University peng lian awmna turin hma kan la zawk a ni,” a ti.