Lunglei district-a school thlan bikah cosmic class tan dawn

Lunglei district-a school thlan
bikah cosmic class tan dawn
School Education minister Dr Vanlalthlana chuan Lunglei district bawrhsap hmalaknaa buatsaih, Mizoram zirna ina vansang chanchin zirna hmun bik – cosmic class (astronomy lab) hmasa ber leh Lunglei district leh Lungsen Aspirational Block-a zirna tihhmasawnna tura hmalakna a hawng.
Education minister chuan Govt Leitlangpui High School Lungleia cosmic classroom chu a hmunah hawngin, Lungsen Higher Secondary School leh Govt Middle School Tlabunga cosmic classroom chu ral atangin (virtual mode-in) a hawng thung.
Lunglei district leh Lungsen Aspirational Block huamchhunga zirna tihhmasawnnan cosmic class (Mizorama zirna ina vansang chanchin zirna hmun bik – astronomy lab hmasa ber), learning bridges (a laklawha zirna bansan – dropout ten zirna an chhunzawm leh theihna tura hmalakna), book nest initiative (thingtlang zirlaite tana zirlaibu leh thawnthubu hlui khawnkhawm), English language foundation (primary sikul thlan bika zirlaite tana Sap tawng bulthut zirna), period pride (hmeichhe zirlai naupangte zinga hmeichhe hunbi kaihhnawih hriselna leh thianghlimna atana hmalakna) leh money wise (sum hman leh enkawl dan inzirtirna) chu department leh agency ho nen kalpui tura a hawn bakah a laklawha zirna chawlhsan naupangte hnenah sikul an kai leh theihnan thirsakawr semin, Book Nest Initiative hnuaia lehkhabu sem tur a dawngtute kutah a hlan.
Sawrkar high school leh higher secondary school zinga HSLC & HSSLC (Science) Exam Centre hnenah science practical exam changtlung zawka kalpui a nih theihnan Directorate of School Education atanga science lab equipment tangkai tur leh mamawh chi hrang hrang a sem bawk.
Cosmic class chu a awmna sikul bakah sikul dang pawhin tangkai taka an hman a beisei tih Dr Vanlalthlana hian a sawi a. Hmalakna hrang hrang chu Lunglei district-a zirna a tha zawnga danglamna thlentu a nih a beisei tih a sawi. Zirna chu khawtlang tana hnawksak lo leh tangkai zawk ni tura mihring chhertu, vantlang tana hahdamna leh hahchawlhna thlentu a ni, tiin, zirna kawnga hmasawn nan sawrkar bakah tlawmngai pawl, sumdawng leh mitin thawh ho a pawimawh tih a sawi a ni.
Cosmic class hi zirlaiten ni, thla, arsi leh van thengreng chanchin a lem hmuh leh khawih theih nena an zir theihnan astronomy lab atana pindan (classroom) cheibawl niin, Lunglei district bawrhsap bultumin School Education department Lunglei leh AstroScape New Delhi nen tangtlanga buatsaih a ni.
Mizorama astronomy lab hmasa ber atan Lunglei district hmun thum – Lunglei, Lungsen (aspirational block) leh Tlabungah dah a ni a. Hemi atana classroom cheibawl hna hi AstroScope hian thawkin, hmanrua chi hrang hrang – telescope lian tha tak bakah, astronomy leh science zirna hmanraw hrang hrang a thlawnin an chhawpsak. AstroScape neitupa Aryan Mishra hi van thengreng lam zirna lama mi hrat khawkheng, India rama thingtlang sikul 320 chuangah astronomy lab (cosmic class) hi an siam tawh a ni.8 Learning bridges hmalaknaah hian naupang sikul kal rual, sikul kal tawh lo ten zirna an chhunzawm leh theihnan anmahni zawn chhuah tum niin, mi tu pawhin chutiang an hriatte awlsam zawka thuneitute hnena an hriattir theihnan QR code siam a ni. QR code scan hnuah google form-ah lutin, an hming, veng leh chanchin chhut luh hnuah thehluh tur a ni a, hei hi Lunglei DC office atangin vil reng a ni dawn. Learning bridges kalpui meka hetiang mi hriat chhuah tawh mi 33 zinga sikul lut leh ta hmeichhe naupang hnenah Disha Foundation pek thirsakawr chu a hawnna inkhawmah hian sem nghal niin, thirsakawr hi sem zel tum a ni.
8 Lungsen Aspirational Block huamchhunga thingtlang khua leh hmun kilkhawr zawka awm naupangten zirlaibu leh lehkhabu tha chhiar tur an neih theihnan Book Nest Initiative hnuaiah Lunglei DC kaihhruaiin Sub-Hqrs YMA Lunglei hnuaia YMA branch-te, UD&PA leh self help group nen Lunglei khawpui chhungah lehkhabu khawn khawm mek a ni. Heng lehkhabu hi Lungsen Aspirational Block-a sikul hrang hrangah sem a ni ang.
8 Lungsen Aspirational Block huamchhunga primary school zirlai leh zirtirtuten Saptawng bulthut nal taka an thiam theihnan Lunglei DC office chuan Education department leh Disha Foundation nen English Language Foundation kalpui mekin, primary school 10-ah hma lak phawt a ni. Disha Foundation atanga dawn zirna hmanraw chi hrang hrang – teaching aids, workbook leh video hmangin zirtirtuten an sikulah theuh zirtirin, kumin October hian endik tum a ni.
8 Project period pride hnuaiah hian zirlai zingah hmeichhiaten thla tin hunbi (period) an neih chungchanga thianghlim leh hrisel zawka inenkawl dan tur inzirtirna kalpui a ni dawn a. Money wise (financial literacy programme) hi Lunglei DC, Education department, lead bank office, SBI, MRB, MCAB, SDO (C) Tlabung leh BDO Lungsen nen tanghoa hma lakna niin, hemi kaltlang hian Lunglei district-a zirlaiten sum leh pai hman dan leh enkawl dan an thiam theihnan inzirtir a ni ang.