Myanmar Chin State huamchhung, Paletwa khawpui atangin tunhnai khan Khumi hnam raltlan 85 chu Lunglei district-a khaw pakhatah an rawn lut a. District bawrhsap Ramdinliani chuan thil awmdan enfiahin an rawn luhna Khawmawi khua chu Thawhlehni khan tlawhin, khawtlang hruaituten an lo dawngsawng.
Raltlan lut tharte a kawmnaah bawrhsap chuan, raltlante chu ramdang mi an nih angin India khua leh tuiten chanvo an neih ang an nei ve thei lo, tih hrilhin, sawrkar, village council leh YMA ten inkaihhruaihna an duan chu tha taka zawm turin a chah. India sawrkarin Myanmar atanga sahimna zawnga rawn lut te chu ‘refugee’ angin pawm loh mah se, Mizoram sawrkarin mahni mihringpuite hmangaihna rilru (humanitarian ground) avangin Myanmar raltlante a lo tuamhlawm tih a sawi a; raltlante chu India sawrkar dan leh hrai zawm tura hrilhin, ruihhlo tawlh leh sualna dangah inhnamhnawih lo turin a a chah bawk.
Raltlante chu a bika ruahman camp-a awm turin a ti a. VC-te hriatpui lohin an duh duha zin kual a, pem kual lo turin a hrilh.
Raltlante nen an inkawm zawh hnuah bawrhsap hian raltlan lut tharte awmna tur in sakna hmunhma a enfiah a. VC hnenah raltlan lut tharte chenna in sakna tur silpouline bundle khat pein, tui lakna tur pipe pawh a rang lama ngaihtuahsak an nih tur thu a sawi.
MP inthlan huna hman tur polling station, Khawmawi Govt. Primary School-a siam chu tlawh nghalin, school thuneitute chu composite grant an dawn atanga inthiarna siamthat chu a rang lama zo fel turin a chah a ni.
Lunglei district-ah raltlan luh belh
