Lunglei district administration hmalakna, “Healthy Lunglei Initiative” hnuaia Civil Hospital Lunglei leh Primary Health Centre (PHC) Lungsena khawl bun thar ‘Health ATM’ chu Thawhtanni khan Health & Family Welfare minister Lalrinpuii’n a hawng.
Health minister chuan Mizorama Health ATM hmasa ber hawn a ni chu a chhinchhiah tlak, tiin, rang takin mahni hriselna dinhmun – BP, zunthlum, taksa inphut dan (BMI), taksaa boruak thianghlim oxygen awm zat, leh thil dang tam tak hriatna atan a hman theih dawn tih a sawi a. A khawl hi IoT (internet of things) technology nena thuam a nih avangin, result a pek chhuah zung zung bakah a hmangtute hriselna dinhmun lo chhinchhiahin, digital health record a vawngtha nghal dawn a, inentir tura damdawi in lian zawk panna atan sum, hun leh tha sen ngai chu engemaw chen a chhawk zangkhai thei dawn tih a sawi a ni.
Healthy Lunglei District Campaign bakah Lunglei DC bultuma ngaihsak leh ngaihven ngaizualte huapzoa hriselna kawnga hmalakna — Project LEAP kaltlanga vohbikte hriselna dinhmun endik leh mi 700 chuang hnena tanpuina hmanrua sem a nite, Project BLOOM hnuaia Lungsen Aspirational Block huamchhunga nu leh naupang hriselna atana hma lak a ni chu hlu a tih thu a sawi a. Health ATM atana CSR haichhuaktu DC office, CSR sum petu ABCI leh BRN leh khawl mamawh buntu MVS India chungah minister hian lawmthu a sawi a ni.
Civil Hospital Lunglei leh PHC Lungsena Health ATM bun tur hian Manav Vikas Sanstha (MVS India), Lunglei Deputy Commissioner office leh ABCI Infrastructures Pvt. Ltd ten inremna (MoU) ziakin, ABCI leh BRN hian CSR kaltlangin Health ATM leina leh enkawl zuina tur sum an tum a; MVS India hian khawl bun, training pek leh khawl vil zui kawngah mawh an phur. DC office hian a enkawlna leh hman zuina tura ruahmanna an bawhzui thung a ni.
Health ATM-ah hian test chi 35 vel tih theihin, taksa nihphung tlangpui – zunthlum, thisensang, lung lam, beng, mit leh rilru lam dinhmun a endik theih a. Hriselna atana ei leh in fimkhur dan tur thurawn a awm bawk. Test hi a thlawna tih theih niin, darkar chanve tling loa zawh vek theih a nih bakah test result hi mahni phone-ah a dawn nghal theih a ni.
Lunglei leh Lungsenah Health ATM bun thar
