Lunglei Polytechnic ngaihven
turin Mizoram sawrkar ngen
Mizoram Polytechnic Lunglei-in a ram luah man a pek theih loh vanga harsatna a tawh mek chu ngaihven a, zirlaiten an zirlai an chhunzawm zel theihnan hma la turin Mizoram sawrkar an ngen tih Congress Thalai chuan an sawi.
Congress Thalai Lunglei (LDYCC) thuchhuak chuan, tunhnaia court-in Mizoram Polytechnic Lunglei-in an ram luah man a ram neitu hnena a pek theih loh avanga 2024 November 12 ralhmaa an building luah lai hmun sarih kalhsak tura Lunglei Police Station officer in-charge hnenah thu a pek chungchangah, an harsatna belhchhah turin November 13 atang hian zirlaiten kumtawp exam an hmachhawn dawn a, lehkha pawh zir mumal thei loin Polytechnic main building atangin Multipurpose Hall-ah an insuan a ngai tih a sawi.
LDYCC president Moses Lalrinchhana Chinzah chuan, Polytechnic Lunglei chu chhimlam tan mai ni lo, Mizoram pumin kan intawm a nih bakah state dang atang pawhin zirlaiten an pankhawm a ni, tiin, hetianga zirna in pawimawh tih thuanawpa a awm tur leh zirlaiten an tuar tur hi Mizoram sawrkarin a rang thei ang bera ngaihven a, an harsatna tawh mek chinfel sak turin an ngen tih a sawi a ni.
Mizoram Polytechnic Lungleiah hian tunah zirlai regular 214 mai an awm a, back paper nei mi engemaw zat an awm bawk.
Lunglei Polytechnic ngaihven turin Mizoram sawrkar ngen
