District Health Society, Lunglei hmalakna Healthy Lunglei District Campaign hnuaiah nimin khan Public Works Department, Lungleia thawktute tan natna inkai chhawn theih loh, Non-Communicable Disease (NCD) chungchang inzirtirna leh an hriselna dinhmun enfiahna buatsaih a ni.
Hun hmanpuitu Lunglei Additional Deputy Commissioner James Miahlung chuan Mizoramah NCD natna chi hrang hrang – BP sang, zunthlum, cancer, adt. a hluar thu leh sawrkar hna thawk zingah NCD vanga aikal lak ngai hriat tur an tam thu sawiin, he’ng natna hian ei leh in leh nun phungah harsatna a thlen bakah inenkawl nan sum tam tak sen a ngai thin a, vei lo turin nun phung uluk leh mahni inenkawl that a pawimawh a ni, a ti.
He hunah hian UPHC Hrangchalkawn-a Medical Officer Dr VL Hrechianga chuan NCD awmzia sawi fiahin, NCD natna lan chhuah dan leh natna lo awm chhan bakah, NCD natna laka inven dan tur kawng hrang hrangte a zirtir a. Zawhna leh chhanna hun hman ni bawkin, hun hman zawhah PWD-a thawktute hriselna dinhmun chu Health Department-a thawktute’n an enfiahsak nghal a ni.
Lunglei PWD thawktu pualin NCD awareness campaign nei
