North Eastern Council sum nuai 1403.40 senga sak tur Lunglei Market & Trade Centre lungphum chu Inrinni khan Commerce & Industries minister Dr R. Lalthangliana’n a phum.
Lungleiin sumdawnna hmun tha zawk an nei thei tur chu lawmawm a tih thu minister hian sawiin, ramdang nena insumdawn tawnna kawngah pawh theihtawp an chhuah mek tih a sawi. Indo-Bangladesh border trade chu a hmunah kalin Bangladesh sawrkar hotute nen an sawi ho tawh a. He insumdawn tawnna atan hian sawrkar laipuia Commerce ministry-ah DPR cheng vaibelchhe 550 thehluh a ni tawh tih a sawi a ni.
Lunglei district-a hmasawnna hna leh ruhrel ruahman mek pawh sawiin Dr R Lalthangliana chuan, mi 15 thawhna tur Geology & Mining Regional office hawn tum a nih thu te; Civil Hospital Lungleia Integrated Laboratory pawh peihfel tep a nih thu te, naupang damlo na zual enkawlna (Pediatric ICU) ruahman mek a nih thu leh Tawipui PHC building chu hawn theiha peih a nih tawh thu te a sawi.
Lunglei Market & Trade Centre sak that tur hi Mizoram PWD report danin, contractor hi Lalzothanga Maubawk Aizawl a ni a, chhawng li-a sak tur niin 2024 August 25-a zawh hman tura tih a ni. A vaiin stall 339, lirthei 30 lenna car parking, two wheeler 71 lenna parking, police beat post, market office, toilet 34 bakah kudam, bawlhhlawh dahkhawmna pawh awm tura ruahman a ni.
NEC Tourism & Industries director Lalrodingi sawi danin, he project hi nikum chhunga NEC-in project a sanction zingah a lian ber a. NEC hnuaiah hmarchhak state thalaite tan training tha tak tak buatsaih a ni thin a, Mizo thalaite chu NEC hmalakna hrang hrang hmang tangkai ve tur leh NEC website-a thil pawimawh tarlante ngaihven ve thin turin a chah.
Lunglei Trade Centre sa dawn
![](https://theaizawlpost.org/wp-content/uploads/tap_logo-min-large.jpg)