Lungleiah rukruk lam tlakhniam
laiin lirthei chetsualna thleng tam
Lunglei district superintendent of Police J Lalmuankima kaihhruaiin January 31 khan Lunglei khawpui chhunga hnu chhuitu, investigating officer-te nen kum hmasa leh kum kal meka pawikhawihna thlen dan khaikhina thlir hoin an thutkhawm.
Kum 2024 chhunga thubuai ziahluh (case register) ennawn a nih bakah kum 2025 chhunga thubuai ziahluh tawhte thlirho a ni a. Thubuai chhuizuina kawnga hriat tur leh zawm tur pawimawhte sawiho a ni bawk.
Kum 2024 chhung khan kum hmasa lam nena khaikhinin, rukruk leh inrawk thubuai nasa takin a tlahniam a. Hemi chungchangah hian Lunglei SP chuan VDP leh tlawmngai pawl nena police-te thawhhona that vang a ni, tiin, lawmthu a sawi a. Mahni in leh a vela CCTV vuahten hnu chhui kawngah police-te nasa takin a pui tih pawh sawiin, lawmawm a tih thu leh mahni in leh a vela CCTV vuah chu intihhmuh zel tha a tih thu a sawi a ni.
Hetihrual hian kum 2023 aiin kum 2024 chhungin lirthei chetsualna kaihhnawihah thihna a thleng tam a. Lunglei SP chuan kawngpui a that tawlh tawlh rualin mipui leh lirthei khalhtute fimkhur deuh deuh a ngai, tia sawiin, zirna in leh kohhran bakah mipuiah a tam thei ang ber inzirtir tum a ni tih a sawi.
SP chuan police-te chu mipuite tana thawk an nih angin mipui tana dawr nuam leh biak nuam ni turin a fuih a. Mobile phone bo chungchangah pawh uluk taka chhuizui zel a nih tur thu sawiin, a lo leitute thleng pawha thubuai siamsak zel a nih tawh tur thu a sawi a ni.
Lungleiah rukruk lam tlakhniam laiin lirthei chetsualna thleng tam
