Lungleiah Lunglei Municipal Council (LMC) huamchhungah hmasawnna tluantling leh tlo a awm theihna tura Localisation of Sustainable Developement Goals (LSDG) kaltlanga hma lakna tur chu adviser to chief minister (Finance & Planning) TBC Lalvenchhunga, MLA chuan Nilaini khan a hawng.
Hmasawnna tluantling, nghet leh tlo a awm theihna tura mipui mimir huapa hmalakna (Localisation of SDG) chu kalphung thar sawrkar ruahmanna pawimawh, “Bana Kaih” hnuaia hmalakna peng pakhat a ni tih TBC Lalvenchhunga hian a sawi a. SDG tehna hnuhnung berah Mizoram chu tehfung thenkhatah kan dinhmun a that viau laiin, rethei leh hausa inkar zau zawngah kan hniam hle a, heng kan hniamna hi siamrem a, hma sawn tura ngaihtuahna sen leh hma lak a ngai tih a sawi. LSDG hnuaia tihhlawhtlin turte chu khawpui nuam, chenna tlak siam tura pawimawh tak tak a nih bakah mipui vantlang huapzo hmalakna a ni tih a sawi a ni.
Lungleia LSDG kalpui tur hi Planning & Programme Implementation department leh LMC thawhdunna a ni a. LMC chairman Lalzuithanga chuan LSDG 2024 chu khawpui hmel tidanglam zawt zawt thei tur a nih angin theihtawp chhuaha tihhlawhtlin tum a tul tih a sawi a. LSDG-in a tum chu, sum leh pai leh hmasawnna ruhrel din uaih uaih lam aiin, khua leh tuiten rilru hrisel leh dik an put atanga hmasawnna nghet leh tlo a awm theihna tur, pawnlam aia chhung lam atanga hmasawnna zawk a ni tih a sawi.
LSDG 2024 under LMC hawnnaah hian Lunglei West bialtu MLA T Lalhlimpuia, LMC councillor-te, sawrkar official-te, local council member-te, tlawmngai pawl hrang hrang aiawh, political party hruaitute, MJA member-te leh Lunglei Govt College, Govt J Buana College leh Nursing School Lungleia zirlaite leh zirtirtute an tel a. P&PI department mithiamte nen LSDG kalpui dan tur zir ho zui a ni.
Lungleiah SGD kalpui dawn
