Lungleiah State University dah dawn
Mizoram State Universiry hmunpui tur chu Lungleiah dah turin sawrkarin a tih thu chief minister Lalduhoma chuan a sawi.
Ningani khan Lunglei High Powered Committee (HPC) chu an chairman, chief minister Lalduhoma hoin an thukhawm a. Chief minister hian Lunglei mipui duh em em Mizoram State Universiry hmunpui tur chu Lungleia dah tum a ni, tiin, State Assembly-a Mizoram State University Bill pass tawhah Aizawlah a hmunpui dah tura lo tih fel vek tawh ni mah se, chhimlam mipuiin Lungleiah awm se an duh tih sawrkarin a hria a. Hei vang hian dan chu a tul anga siamthat (amend) leh mai huamin Lungleiah a hmunpui dah an tum tih a sawi a ni.
HPC vice chairman V Malsawmtluanga, MLA chuan tun tum hi chief minister-in an hmunhma ngeia HPC thutkhawm a neihpui tum khatna a ni tih a sawi a. He hmunah hian Lungleia a tum khatna atan Council of Ministers thutkhawm an lo nghat tawh bawk tih sawiin, chief minister-in Lunglei khawpui a ngaihsak zia a takin an hmu chho zel chu a chungah an lawm hle tih a sawi a ni.
Thutkhawmah hian Lunglei Bypass Road sialna tur hmalakna an thlir hoa, a bawhzui zel dan an rel. Lungleia Cooperative Training Centre din leh Govt. Lunglei College tihhmasawnna tur an sawiho a. Mizoram chhimlamin airport a neih ve theihna tura hmalakna chief minister hian sawiin, chhim lam leh khaw chhak lama airport siam belhna tur ram thlithlai mek a nih dan a sawifiah.
Lungleiah State University dah dawn
