Lungleiah TB vei hmuhchhuah
mi 147 atangin 134 enkawl dam
Kum kalta chhung khan Lunglei district-ah ngawr (TB) vei rinhlelh enfiah 3772 atangin a vei 147 hmuh chhuah an ni a, an zinga 134 chu enkawl dam niin, enkawl laia thihpui 6 an awm.
Lunglei District TB (Tuberculosis) Forum chu district additional DC Rochuangkimi Khenglawt hoin an Ningani khan thukhawm a. Kum kalta leh kal meka TB tih remna tura hmalaknaa thlirhoin, TB umbo tura ni 100 chhung beihpui thlak, ‘100 Days TB Intensified Campaign for TB Elimination’ kalpui tur, zau zawka inzirtirna kalpui tum leh TB veite chhawmdawlna leh hamthatna atana hmachhawp awm leh hmasawnna tura rawtna sawi ho a ni.
TB umtbo tura ni 100 chhung beihpui thlak tuma inbuatsaihna sawiho niin, TB vei hlauhthawnawm dinhmuna dingte zawng chhuakin he beihpui thlak chhung hian an dinhmun enfiah vek a ni dawn tih sawi a ni a. Khaw hrang hrangah TB vei enfiah, enkawl, chaw tha pek leh TB ven kawngah inzirtirna kalpui a ni dawn.
Health & Family Welfare department chhinchhiah danin, Lunglei health district (Lunglei district leh Hnahthial district) ah mihring 189094 vel awma chhut niin, khawpuiah mi 86136 leh thingtlangah 102958 cheng anga chhut a ni. Kum 2024 chhungin Lunglei health district-ah TB vei rinhlelh enfiah 3772 atangin a vei hmuh chhuah 147 (chuap TB 77, chuap ni lo TB 66 leh MDR TB 4) an awm a. Mi 134 enkawl dam niin, TB vei enkawl laia thi 6 an awm.
Kumin January- April chhungin Lunglei health district-ah rinhlelh enfiah 644 atangin TB vei hmuh chhuah 44 (chuap TB 24, chuap ni lo TB 17 leh MDR TB 3) awmin, mi 39 hlawhtling taka enkawl an ni. Enkawl laia thi 2 an awm.
Lungleiah TB vei hmuhchhuah mi 147 atangin 134 enkawl dam
