Lungleiah zirlaite school
bag ah rih zawk endik tan
Lunglei district-a school naupang bag rit lutuk chhawk zangkhai nana district bawrhsap hoa ruahmanna siam hrang hrang chu zirna inten an zawm that leh zawm that loh endikin Inspection Team an thawk chhuak tan a. Zawm an awm rualin, district thuneitute thuchhuak lo la chiang vak lo pawh an awm nia sawi a ni.
Inspection Team hi Lunglei sub-deputy commissioner Lalhlimpuii Pachuau chuan hoin, sub-divisional education officer (Lunglei South) leh thawktu dangte an tel a. School pali – Baptist Higher Secondary School Serkawn; Baptist English School Serkawn; Govt Middle School Pukpui leh Govt JNM Middle School Electric Veng an tlawh. School-ah lehkhabu riahna tur bawm (locker/ shelf) awm leh awm loh, ni khata subject neih zat, ni khata home work neih zat, school-a tui thianghlim in tur a awm leh awm loh an endik bakah school naupangte bag rih zawng an teh a ni.
Lunglei district bawrhsap hoa school naupang bag rit chhawk zangkhaina tura ruahmanna siam a nih angin, school tinin lekhabu dahna (bookshelf) ruahman a, sawrkar inkaihhruaina anga ni khatah class I & II tan subject thum, class III- V tan subject li, class VI- X tan subject ruk anga class kalpui; homework pek chungchangah nitin primary school-ah subject khat, middle school-ah subject hnih leh high school & higher secondary school-ah subject thum aia tam pe lo tur leh, school tinah zirlaiten tui in tur thianghlim leh hnianghnar an neih theihnan ruahmanna siam turten district election officer atangin school tinah hriattirna pek a ni tawh.
He ruahmanna hi school hrang hrangin an zawm dan endik turin Inspection Team hi din a ni. A remchan danin endik hna hi an la kalpui zel dawn a ni.
Lungleiah zirlaite school bag ah rih zawk endik tan
