Lungsen Block-ah damdawi
ina nau nei zat a pung chak
Aspirational Block Programme leh Project BLOOM (Better Living through Outreach, Optimal Maternal & Child Health) kaltlanga Lungsen Aspirational Block huamchhunga nu leh naupang hriselna atana hmalaknaah hmasawnna hmuh zel niin, nau piang zat atanga chhuta damdawi ina nau neih zat chuan a tum khatna atan June– July 2025 chhungin zaa 70 a kai.
Lungsen RD Block chhunga damdawi ina nau neih (institutional delivery) zat chu March 2023-ah 14.73% atangin Aspirational Block Programme hnuaia hmalakna kaltlangin March 2025-ah 43.14% ah a kai chho a. June 2025-a Project BLOOM kalpui hnuah hmasawnna nasa zawk hmuh belh niin, June -July ah chuan 72.2% a kai tawh.
He’ng hmasawnna hi Project BLOOM hnuaia nu nau paiin damdawi in ngeiah nau a neih theihnana inzirtirna, a thlawna koh mai theih tur lirthei – Safe Womb Wheel ruahman, nau nei tur leh buaipuitute lo chawlh lailawkna khualbuk (waiting room) ruahman, raipuar an nau pai atanga thla thum chhunga inziaklut hnena ‘BLOOM Gift Basket’ pek leh hmalakna dang dang rah chhuah a ni.
Raipuarten enkawlna leh chaw tha a hun taka an dawn theihnan an nau pai atanga thla thum chhunga inziahluh (antenatal care – ANC registration) chungchangah pawh hmasawnna hmuh niin, nau pai tirh thla thum chhung (1st trimester) a inziak lut March 2023-ah 50.6% an awm laiin, June– July 2025-ah chuan 65.38% ah a pung chho tawh a ni.
Lungsen Block-ah damdawiina nau nei zat a pung chak
