Lyon lamah loan-in Liverpool midfielder Morton a inpuchhuak ta
Ligue 1 club lian Lyon chuan pound maktaduai 15 lekin Liverpool midfielder Tyler Morton an lei.
Kum 22-a upa ni mek Morton hian kum sarih mi lek a nih laiin Liverpool academy a zawm a, kum 2021 khan Anfield club tan hian a senior debut a nghakchhuak.
First team-ah hian khelhna hmun nghet a chang zo ta tlat lo a, inelna hrang hrangah belhkhawmin match 14 chiah a khel tling a; loan-in Championship club Hull leh Blackburn Rovers lamah chhuahtir a ni.
Kumin nipui thawt tan tirh lai khan England under-21 team chu European Championship title a lakpui nghe nghe.
Lyon hian sum lama harsatna lian tak an tawh zui tak avangin kumin nipui tirh lam khan France rama an second tier-ah an tlahniam a, mahse, an khinlet hnuah Ligue 1-a hlanchhoh an ni leh ta a ni.
Liverpool boss Arne Slot chuan season chawlh chuan hian squad tihchak lehzual hna a thawk nasa hle a, champion nih manah bazarna sum pawh a ak chhah thawkhat niin a lang a, 2024-25 Premier League title an lak hnu khan mithar sengluhna ringawtah pound maktaduai 250 chuang a phawrh tling tawh!
Premier League lamin sum chelek zat tur an bithliah profit and sustainability rules (PSR)-in a danchep lohna turin player hralhchhuah lam pawh a hlamchhiah thiang bik lo a, academy graduate lam thehthang lamah kua an hreuh a, thla hmasa maia Bayer Leverkusen lama pound maktaduai 35 zeta an hralhchhuah tak Jarrell Quansah pawh kha an hnuaia inzirchhuak tho a ni.
Lyon lamah loan-in Liverpool midfielder Morton a inpuchhuak ta
