Mara Autonomous District Council Budget Session 2024 ni thum awh chu Zirtawpni khan neih zawh a ni a. 2024-2025 atana sum hman tura ruahman cheng nuai 21736.21 chu pawm a ni.
Budget Session hi MADC chairman N Viakhu kaihhruaia neih a ni a. A tawp ni, Zirtawpni ah hian chawhma thutkhawmah zawhna lutte chhan niin, chawhnu thutkhawmah kum 2024- 2025 atana MADC sum hman tura ruahman nuai 21736.21 (Local Revenue Receipt nuai 236.20 telin) chu member-ten an sawiho hnuah pawm a ni.
2024- 2025 Budget Estimate grant -in- aid atanga sum hmuh beisei dan chu – salary atan nuai 20147.23, non salary atan nuai 1,172.60, VC salary atan nuai 55.56 leh VC non salary atan nuai 124.62 niin, a vaiin nuai 21500.01 a ni a, budget punna hi nuai 1379.51 (6.85%) a ni.
Tun tum MADC Budget Session-ah hian unstarred question 6 a lut a, starred question 33 lutin 28 chhan hman a ni. Official bill pakhat – The Mara Autonomous District Council (Marriage and Divorce) Bill 2024 leh rules pakhat – The Mara Autonomous District Council (Animal Husbandry and Veterinary Department Group ‘A’ Post) Recruitment Rules 2024 a lut a, pass ve ve a ni.
MADC budget nuai 21736.21
