Manchester City midfielde Rodri chuan Spanish club lian Real Madrid zawm a hreh lo viau a, Atletico Madrid player hlui a nih vang ngawta Real Madrid zawm thei lo ngawt tur tih dan a awm bik chuang lova a hriat thu a sawi.
A vanglaia holding midfielder tha ber ang hiala ngaih Rodri hian kum 2009 khan La Liga club lian Atletico Madrid atangin English Premier League club lian Manchester City a zawm, Manchester City ah a chetha viau a, kum 2014 khan Vinicius Junior hmakhalhin football a mimal chawimawina sang ber Ballon d’Or a dawng nghe nghe. Manchester City tan hian inelna hrang hrangah vawi 293 a khel a, goal 28 a thun. City hi Premier League-ah vawi li a champion pui a, FA Cup, Champions League, UEFA Super Cup leh Fifa club World Cup-ahte vawi khat theuh a champion pui bakah English Football League Cup-ah vawi thum a champion pui bawk.
Club leh ram tan a khelh that vanglai takin hliam na tak a tuar a, hlam vangin kum khat chuang zet a inkhel thei lo. A hliam dam tawh mah se a hma erawh a 100% in a phak thei tawh lo thung. Season kal mekah hian City tan vawi 8 a inlan tawh a, khel tha vung hlut lem lo mah se team tan a thawhhlawk viau zel tho thung. City-a a contract neih mek hi 202-27 season tawp hunah a hmang zo ve tawh dawn, Contract a neih rei tawh loh vangin Etihad chhuahsanin club dang a pan dawn niin sawi tlang than a ni.
Tarlan tawh angin Rodri hian Manchester City a zawm hmain Atletico Madrid tan a khel hmasa a, Atletico Madrid tan hian vawi 47 a khel tling tawh. Real Madrid leh Atletico Madrid te hi khaw khat club, inel em em reng an ni a. An player pawh an inlei tawn ngai lo viau bawk a. Real Madrid leh Atletico Madrid tan khel kawp tlemte erawh an lo awm ve tawh tho thung. Belgium goalkeeper Thibaut Courtois leh Spain forward Alvaro Morata te chu Real Madrid leh Atletico Madrid te tana khel kawp langsar zualte an ni. Rodri hi Real Madrid in an awt viau thin a, nipui bazar inhawn hunah pawh lak an tum ngei a rinawm. Rodri ngei pawh hian Real Madrid zawm a chak ve viau tho bawk a. “Khawvela club tha berin an sawmna chu tuin nge hnar phal tehlul ang ni,” a ti ve thlawt a ni.
Rodri hian Spain tan vawi 59 a khel tling tawh a, Kum 2024 khan Euro-ah a champion pui a, Nations League-ah a champion pui leh bawk. Spain manager Luis de la Fuente chuan friendly match a Serbia leh Egypt hmachhawn turah a ko tel a. USA leh Mexico a khelh tur World Cup-ah pawh Spain ai a awh ngei tura ngaih a ni a, player ngaihven hlawh zingah a tel ang.
Madrid zawm hreh lo Rodri
