Maduro lakah Venezuelan te lawm lo

Venezuela inthlan result tihchingpena ngaih avanga lungawilohna lantirnaah lungawilote leh Security forces te inbeiin rubber bullets te hial hman a ni a.
Caracas khawpuiah mi sang tam tak pungkhawmin presidential palace pana kawngzawhna neih a ni a.
Mipui ten lungawilohna an lantirna chhan hi President Nicolas Maduro-an inthlanah chakna a chang tia a puan chian hnuah a ni a.
Opposition-te chuan Maduro-an chakna a chang chu inbumna a ni tia sawiin opposition candidate Edmundo Gonzalez chuan 73.2% vote hmuin a chak zawk an ti thung.
Inthlan hmaa opinion poll lak tinah pawh Edmundo Gonzalez chuan hneh takin chakna a chang turin an hrilh lawk vek a ni.
Kum 11 lai thuneihna chang tawh President Maduro thlak a nih theih nan Opposition tin te chu tangrualin Gonzalez chu an vawrchhuak a ni.
Khawthlang ram mai bakah Latin American ram te leh international body UN te pawhin Venezuelan thuneitute chu polling station tina voting records phochhuak turin an ngen a.
Argentina chuan President Maduro an inthlana chakna a chang tia a inchhal chu a pawmpui duh lo va, hei vang hian Buenos Aires a Venezuela diplomats chu Caracas in a kohhaw nghal a ni.
Hei mai bakah hian Latin America ram paruk dang – Chile, Costa Rica, Panama, Peru, Dominican Republic leh Uruguay a diplomats te pawh kohhaw an ni tiin Foreign Minister Yvan Gil chuan a sawi bawk.
Venezuela sorkar chuan Venezuela atanga Dominican Republic leh Panama a commercial air flight tin te pawh a titawp nghal vek bawk.
Caracas khawpui kawtthlerah chuan sipai leh police tam tak dah niin water cannon te pawh chhawpchhuah a ni a. Security forces te chuan tumahin presidential palace an thlen an rem ti lo.
Mipui te chuan sorkar chu tlu tura ngiatin ‘zalenna, zalenna’ tiin an aurual bawk a. Motor tyre te hal niin police ten tear gas in an kap bawk.
Hmun thenkhatah chuan president Maduro poster te chu pawhthler niin hmun tam takah car leh tyre te pawh halin a awm bawk.
Armed police, military leh left-wing paramilitary te sorkar lamtang te chu hmun tam takah lungawilohna lantirtute nen inbeiin khawpui kawng tam tak danchahin a awm bawk.
Kum 41-a upa Paolo Sarzalejo chuan vote chu tihchingpen a ni a ti a. 70% vote hmuin kan chak zawk a, an tih thin dan ang ngaiin min chhuhsak leh ta a, he inthlan pawh hi min chhuhsak leh a ni a ti a. “Kan thalaite tan hma lam hun tha zawk kan duh a ni,” a ti bawk.
“Inthlanah a chak lo va, thuneitu a ni zui thei tawh lo. |halaite tan hma lam hun tha zawk kan duhsak a, a nih loh chuan ram an chhuahsan dawn. Hnathawka hlawh tha an hmuhnaah an kal mai dawn a. Ram hausa kan ni a, engkim a tichhe vek tawh a nih hi. |halai ten kan ram an chhuahsan chuan Venezuela ah hian senior citizen te bak kan awm dawn lo” tiin a sawi.
Venezuela flag a intuam Cristobal Martinez pawhin inthlan chu tihchingpen a ni a ti a. |halai tam ber ten tun inthlanah hian vote an thlak nasa a, thalaite tan hna vang chu manganna tham a ni.
“Vote ka vawikhat thlakna a ni a, zing dar ruk atangin dar 9 thlengin ka awm a, kawtthlerah thalai vote thlak tur an tam lutuk” a ti bawk a. “Sorkar lakah lungawilohna a nasa em em a, mipui nawlpuiin sorkar thar an duh a ni” a ti bawk.
President Maduro chuan hun rei tak rorelna a lekkawh tawh chungin thil inthlak danglam a awm lo, President Chavez thih hnuah kan dinhmun a chhe tial tial zawk a ti bawk.
Kum upa lam te chu dem bawkin sorkar in bonus a pek leh thil pek a pek thin duhtawk ringawtah a puh bawk a. “Thil inthlak danglam kan duh a ni, hna tha kan duh a, kan ram hma lam hun tha se kan duh,” tiin a sawi bawk.
President Maduro chuan opposition te chu sorkar paihthlak a nih theih nana mipuite fuihah a puh a. “Vawiina kan thil tawn ang hi kan tawn vawikhatna a ni lo” a ti a. “Venezuela sorkar paihthlak an tum a ni” tiin a sawi.
Venezuelan attorney general chuan kawngpui danchah a nih renga dan bawhchhiatna a awm reng chuan dan angin nataka hmalak a ni ang a ti a, buaina kaihhnawihah mi 32 manin an awm tawh a ti bawk.
Hetih lai hian US senior administration chuan inthlan result chu data kan neih te nen a inmil lo tia sawiin inthlan result tihchhuah chu mipui te vote thlak dan nen a inmil lo thei tiin a sawi a. “Chutak chu kan ngaih tithalo tu ber chu a ni” tiin a sawi bawk a.
“Chuvang chuan a nia Venezuelan electoral authority te chu result an puan tichiang turin data tichhuak tura kan ngen ni,” tiin a sawi bawk.
Hetih lai hian South America ram inzawmkhawn Organization of American States (OAS) te chuan Venezuelan inthlan result chungchangah Nilaini hian permanent council meeting an koh thu an sawi nghal bawk.