Mafia chhut chah tumin Italian police-in beihpui thlak

Mafia chhut chah tumin Italian police-in beihpui thlak
Italian police-te chuan Sicilian khawpui, Palermo leh a chhehvela Mafia chevelte bitumin dap chhuah beihpui an thlak.
Officer 1,200 chuan thawk chhuahin sipai, Carabinieri-te chuan heng lai vela Mafia chhut chimih an tum tih an sawi.
Tun tuma dap beihpui an thlak hi kum tam tak chhunga an thawh rip ber tum a ni a, Italian thuneitute chuan Mafia rorel khawp ber, Cupola indin thar leh tumna awm nia an hriat tihtawp an tum a ni.
An thubuai ngaihtuah that lehnaah tun hnai khan Mafia boss thahnem tak chu lung in atangin chhuah an ni a; mahse, chhuitute chuan lung ina an awm lai pawhin mobile phone ruk hmangin thil an tikual reng niin an hria.
Sicily-a Cosa Nostra mafia-te chuan an pawl dintute lo kalpui thin ang an kalpui thar leh a, a taka inhmu kher lovin thil an ti mai zel niin an sawi.
Tual chhunga an hruaitu pakhat pawhin amah biru daih chungin a awmna district-ah a huhova pawi khawihna chi chu a la vil reng tho niin police chuan an sawi.
Sicily-a Mafia hlauhawm tak hi kum 100 chuang kal tawh atang khan khua leh khawpuiah an che na thin hle a, sumdawngte pawisa chhuh luiin ruihhlo tawlhnaah an inhnamhnawih nasa bawk.
Kum 1990 chho velah phei kha chuan anmahni beitu leh an laka roreltute bei letin an that nasa hle.
Kum 1993 khan hetih hun laia an boss-te boss lehchhawng, Salvatore ‘Toto’ Riina chu Palermo-ah man a ni a, kum 2023 khan tual chhung damdawi ina a inentir laiin Matteo Messina Denaro man a ni bawk.
Lung ina an dah tam tak chuan a rukin mobile phone an lo nei thei thin a, pawn lama an mite hnenah thu an pe thei reng niin Carabinieri chuan an sawi.
Police chuan an mi rinhlelhte in leh lirtheiah ngaihthlakna hmanrua dah ruin an inbiakna an hre fuh nual niin an insawi a. Hetih lai hian an thil hriat fuhte hi a kimchang tak hriat an la nei fuh hleithei lo niin an sawi.
La Repubblica chanchinbu chuan police hian inbiaknaa telte hi man chhuah tumin an bei mek a, hming lemah Robert de Niro leh Spider Man tih te pawh an hmang niin an tar lang.
Thawhlehnia dap beihpui thlak hi khaw var hma atanga tanin Palermo pumah kalpuiin hmar lamah Tommaso Natale atangin khawpui laili, Porta Nuova thlengin an dap.
Police hian an chhuinaah an rinhlelhte bakah mafia leh ruhhlo tawlhnaa inhnamhnawih te, tualthah tuma che leh ralthuam chelekte pawh an tel vek tih an sawi.
An mi man zingah hian an boss thenkhat, tun hnaia an tan hun tur tang zova an chhuah leh tawhte pawh an tel leh niin an sawi.
An zingah hian kum 12 zet a tan hnua kum 2023-a chhuah, Tommaso Lo Presti pawh a tel nia sawi a ni.
Nikum khan Lo Presti-a hian a nupui neih kum 25-na chu Palermo biakin, anti-mafia prosecutor Giovanni Falcone-a phumna hmuna a lawm avangin sawi a lo hlawh tawh hle.