Tunhnaia Durtlang Leitana inkhawihrawn avanga hliam na tak tuar an awm chungchanga magisterial enquiry lak phut thu sawi chu sawrkarin official-in phutna an la dawng loa, heti ang hian kalpui ngei tur a ni em tih an la sawi thei lo tih Home minister K Sapdanga chuan a sawi a. Pawikhawihtua puh zingah police an tel ve avanga police tan zawnga hma lak zui erawh a awm dawn lo tih a sawi.
Home minister hian September 21 zan reia Durtlang Leitan bula damdawi ina enkawl ngai khawpa kutthlak rawnnna a thleng chu sawrkarin pawi a tiin a ngai thutak hle tih a sawi a. Kut tuartute chu pawi sawi lo an nih bakah mipui rawngbawlna kawnga mi pawimawh tak an ni a, pawi khawihtute zingah sawrkar mi – police a lo tel ve chu sawrkarin a ngai thutlak hle tih a sawi bawk.
He thil thleng hian sawrkar beng a thlen ve leh police-ten dan hnuaia tih theih ang apiang an ti nghal a, pawikhawihtute chu an chungthu hi danin a remtih ang chin sang ber zela kalpui tum a ni anga, police lo inhnamhnawih ve pawh suspend nghal a ni tih a sawi.
September 23-a medico legal case (MLC) injury report la tur ni awm taka kal constable-in doctor-te leh thawktu dangte rilru hliam zawnga tawngkam a thlah niawma sawi pawh chhuichian a ni tih a sawi a. Dan bawhchhetuten an phu tawk hremna an hmuh theihnan thil thlen dan chiang taka chhui chhuak turin ruahmanna siam a ni tih a sawi a ni.
Thuthar thehdarhtute zawhna chhangin Home minister chuan, he thil thlenga magisterial enquiry phutna awm chu sawrkarin a kalphung dik taka ngen/ phutna a la dawn loh avangin magisterial enquiry din leh din loh tur an la sawi thei lo tih a sawi a. Police leh police vanga intanna a thleng dawn lo, tiin, tunah chuan danin a phal angin pawikhawihtua puhte hi bail-a chhuah an ni mai a, he thubuaiah hian an zalen ta tihna erawh a ni lo tih a sawi.
Magisterial enquiry lak phutna official-in kan la dawng rih lo – Home minister
