Magnesium i tlachham a ni lo maw?
Kan taksain a mamawh ang magnesium a neih loh chuan kan rin phak bakin taksa a nghawng thei niin mithiam ten an sawi, Magnesium chu mineral a ni a, kan taksain thil chi hrang hrang a tih theih nana puitu a ni. Tihrawl chetvelna te, nerve hnathawh te, thahrui siamna te leh ruh hriselna thlengin magnesium chu a pawimawh. Magnesium chu kan ei leh in atangin kan la lut thei a, nuts, thil chi (seeds), thlaihnah hring leh whole grain-ah te a tam a, chutihrualin kan taksa mamawh ang magnesium kan nei lo fo lawi si a, chutiang chu hypomagnesemia an ti. Tun tumah hian kan taksain magnesium a mamawh ang a nei lo tih hriat theih dan, kan taksaa a rawn lan chhuah dan ni a Times of India-in a sawite kan rawn tarlang e.
1. Tihrawl kham leh na: Tihrawl kham leh na, inpawt deuh zawk zawk ang chi te kan nei deuh fo a nih chuan magnesium tlakchham vang a ni thei. Magnesium chu tihrawl tihahdamtu a ni a, kan tlakchham chuan tihrawl hi a lanchhuah hmasakna a ni duh hle a ni.
2. Chau deuh ngawih ngawih reng: Zan lama i mut that viau hnuah pawh i la chau deuh ngawih ngawih reng mai a nih chuan magnesium tlakchham vang a ni thei. Magnesium chu kan ei leh in te energy atana lo siam zung zungtu pawimawh a ni a, kan tlakchham chuan kan chauin kan lo zawi mai thin.
3. Lungphu mumal lo: I taksain magnesium a tlakchham viau chuan lungphu a tirang vak thei a, lung phut dan a timumal lo thei. Vanduai phei chuan lung lamah harsatna te pawh a thlen thei. A chhan hriat tur awm si lo a awmbawr na leh lungphu mumal lo i nei thin a nih chuan magnesium lo check chhin teh.
4. Mood fuh lo deuh reng: Magnesium tlakchham chuan thluak hnathawh a nghawng a, mood a fuh lo deuh reng mai a ni. Thinrim deuh tlat emaw, lungngaih deuh tlatna te a thlen thei.
5. Zan mut harsat: Zanah muthilh mai i harsat viau a, i muhil tawh hnu pawh i harh leh deuh sek thin a nih chuan magnesium tlakchham vang a ni thei. Magnesium hi muthilhna hormone melatonin insiamna puitu a ni a, melatonin chu rilu leh ngaihtuahna tihahdam a, tui taka min muthilh tir theitu a ni.
6. Chawmawlh leh za deuh mer mer: I kut le ke bakah hmai te a chawmawlh (numb) thin em, a nih loh pawhin za deuh mer mer leh pin/hruai a chhun deuh zeuh zeuh ang ten a awm thin em? Nerve-in signal dik taka a thawn theih nan magnesium a mamawh a, magnesium kan tlakchham chuan nerve communication a buai thin.
Magnesium tlakcham chuan a tamna chaw – almond, spinach, maimu (punpkin seed), balhla leh whole grain te ei tam ang che.
Magnesium i tlachham a ni lo maw?
