Maharashtra-ah BJP-in minister zahve chang dawn, CM atan Fadnavis?

Maharashtra-ah BJP-in minister zahve chang dawn, CM atan Fadnavis?
Maharashtra-a tangrual, Mahayuti-in sorkar thar an siam tura chief minister an tihfel theih loh chu a fel hnai tak zet taa ngaih a ni a. Ningani zan khan Delhi-ah thukhawmin an chin fel beisei a ni.
BJP kaihhruai tangrualah hian saffron party hian chanvo lian pathum telin cabinet 12 an chang dawn nia sawi a ni a. Eknath Shinde-a kaihhruai Shiv Sena pawhin chief minister tur chu tu pawh a pawm thei nia sawi a ni a. Ajit Pawar-a kaihhruai National Congress Party (NCP) chuan cabinet pakua an chang ve thung dawn a ni.
Maharashtra hian chief minister nen minister 43 an nei thei a, BJP hian a zahve an chan rin a ni.
Chief minister tang lai, Shinde-a chuan BJP-in thutlukna an siam ang ang a pawm theih thu a sawi tawh a. Ministry pawimawh zual pathum – urban development, public works department leh water resources pawh an chan tura ngaih a ni.
Chief minister hi BJP atangin a ni ang a, deputy chief ministers pahnih awmin Sena leh NCP-a mi an ni thung dawn nia sawi a ni a. Pawar-a chuan sorkar thar lak luh hi tun kar tawpah a ni dawn niin an hruaitute hnenah a sawi tawh nia sawi a ni.
Hun eng emaw chen chief minister tura an buai hnuah Sena hruaitu, Shinde chuan Nilaini tlai khan an party chuan Prime Minister Narendra Modi leh Home Minister Amit Shah te thutlukna ang a pawm thei vek tih a sawi tawh a ni.
Mi thenkhat chuan Shinde-a hi chanvo an pekah a lungawi lo thei lo niin an sawi a. Party pathum tangho zingah BJP hian bial 132 an la a, NCP lak nen member 288 awmnaah sorkar an siam thei a, Sena hi chhuak mah se party pahnih sorkar a ding thei a ni.
BJP-in chief minister chanvo an chang dawn tih a chian deuh ruak hnuah Shiv Sena (UBT) chuan Shinde-a hi an deusawh nghal a. An hruaitu, Ambadas Danve chuan BJP hian anmahni thu thuin thutlukna an siam a, Shinde-a hian engmah tih a nei thei lo niin a sawi.
A hma pawhin Sena (UBT) MP Sanjay Raut chuan Shinde-a hian Mahayuti-ah a tih tur a hlen tawh a, BJP-in an chief minister-tir dawn lo niin a lo sawi tawh.
Shinde-a hi kum 2022-a a hote nen an hel avangin Uddhav Thackeray-a kaihhruai Sena tiphelin an sorkar a paih thla a, BJP thawhpuiin chief minister ni zui ta kha a ni.
BJP hian chief minister tur tak la puang lo mah se Devendra Fadnavis a nih rin a ni a. Ani hi an state-a an hruaitu hlun leh chief minister lo ni tawh a ni.
Nagpur South-West MLA hi Mahayuti-in hnehna an channaa pawimawh tak a ni a. Shinde-a’n Thackeray-a sorkar a pheh tluk lai pawh khan No. 2 nih hnial lo tawh kha a ni a, duhsak a hlawh.
BJP worker-te pawhin chief minister atana an duh ber niin an thawhpui pakhat, NCP pawhin Shinde ai chuan an duh bawk nia sawi a ni.
Hetih mek lai hian BJP hian rualkhai taka chanvo an sem a ngai a. Home Minister Shah pawhin BJP hruaitu hlun, Vinod Tawde biain Shinde-a hnawla Fadnavis-a dah chu Maratha hnamah an tlak nat loh phah thei ang em tih a sawipui a. Shinde-a hi Maratha a ni a, Fadnavis hi Brahmin a ni thung.
Shah-a ho hian Ningani zan khan Fadnavis-a hi Delhi-an an thukhawm a, hetah hian Mahayuti-a an thawhpuite pawh an tel a, thutlukna an siam rin a ni a, he chanchin ziah lai hian hriat a la ni lo.