Maharashtra CM tur a la chiang lo, an tifel tep niin an insawi

Maharashtra CM tur a la chiang lo, an tifel tep niin an insawi
Maharashtra assembly inthlana chiang taka Mahayuti-in hnehna an chan atanga ni li hnuah pawh BJP kaihhruai tangrual chuan an chief minister tur an la tifel thei lo zel a. Hetih lai hian BJP hruaitu hlun, chief minister hlui, Devendra Fadnavis chuan Mahayuti-a tel party pathum chu an an inrawn mek zel a, ‘a chhanna a lo chhuak thuai dawn’ a ti.
BJP hian Fadnavis-a hi chanvo sang ber chang tura an duh laiin an thawhpui, Shiv Sena chuan an hruaitu, Eknath Shinde an duh ve thung a. Hetiang karah hian BJP chuan an thawhpuite hi harsatna lian zawk a thlen lohna tura inveng chungin an inrem lohna lai a titipui mek zel.
Eptute chuan Mahayuti-in chief minister tur an thlang har lutuk chu an lo sawisel ve mek a, BJP etawh chuan sorkar siam chu an hmanhmawh lem lo tih an sawi thung a. “Hun bi engmah kan intuk lo va, Uttar Pradesh-ah pawh sorkar siam nan chawlhkar hnih lai hun hman a ni,” an ti.
Chief minister tur mai bakah hian BJP, Shiv Sena leh Ajit Pawar-a kaihhruai National Congress Party (NCP) hruaitute chu tute nge minister ni ang a, eng chanvo nge an chelh ang tih sawi fel an ngai bawk.
Maharashtra hian chief minister chhiar telin minister 43 an nei thei a. Mahayuti MLA 230 zinga 132 zet thawhtu, BJP chuan minister zahve an chang ang a, a zahve dang chu an thawhpui pahnih kian tur anga ngaih a ni.
Kum 2022-a Shinde-a hela BJP puihna nena Uddhav Thackeray-a sorkar a paih thlak khan chief minister a ni zui a, MLA ngah lo zawk ni mah se minister a ngah zawk bawk a. Fadnavis-a pawhin deputy chief minister chanvo chelh pawh a hnial lo bawk.
Tun tumah erawh BJP hi an sang filawr hle a, an duh dan tilal ngam tura ngaih an ni a. BJP hruaitute chuan an party worker-ten Fadnavis-a hi chief minister atan an duh a, BJP ideological parent RSS pawhin Nagpur South West MLA hi an duh bawk nia sawi a ni.
Hetih lai hian Shiv Sena hruaitute chuan inthlan hi Shinde-a kaihhruaina hnuaia chak an ni a, a chief minister zui tur niin an sawi ve thung.
A hma pawhin an party thupuangtu, Naresh Mhaske chuan ‘Bihar model’ sawiin, “Bihar ang bawkin, BJP hi tam zawk mah se JD(U) hruaitu Nitish Kumar chu chief minister a ni a, Shinde pawh a ni zui turah kan ngai,” a ti.
Sena hruaitu leh MLA Sanjay Shirsat pawhin Mahayuti-in hnehna an chanah hian Shinde hi a pawimawh hle tih a sawi a. “Thil tam tak kan hlan a, thuneihna kan kalsan a, puhna mawi lo pawh kan tuar a, tunah kan tho leh ta a ni,” a ti.
Mahayuti-in chief minister tur an thlan fel mai loh chungchangah hian Shiv Sena (UBT) chuan kum 2022-a Thackeray-a sorkar paih thlaa an party tipheltu, Shinde an bei mek.
Inthlan result a chhuah hnu lawkah Thackeray-a chuan Shinde-a chu Fadnavis-a hnuaia thawk tur a nih thu a sawi a. Thackeray-a lamtang, Rajya Sabha MP Sanjay Raut pawhin, “Shinde hi chief minister a ni dawn lo, a tum chu hlen a ni tawh,” a ti bawk.
Sena (UBT) MP Priyanka Chaturvedi pawhin news agency ANI hnenah, “Fadnavis-a inthlang a nih chuan puang vat ta che u, eng nge in nghah? Maharashtra mipuite hi engati nge lai taka insiam?” a ti.