Supreme Court-in May 11-a Maharashtra politics buai chungchanga thuremna a siamah Speaker chu MLA thenkhatte disqualification petition-ah thutlukna a siam tur a ni a tih avangin Speaker Rahul Narwekar thutlukna nghah thupin a awm mek a.
Narwekar hi south Mumbai-a Colaba a piang leh seilian niin thalai a nih laiin Shiv Sena luhchilhin youth leader a ni a. Sena a chhuahsan hnuaiah kum 2014 khan Nationalist Congress Party (NCP) ah lutin Mawal constituency atangin Lok Sabha candidate a ni zui a. Mahse, chak lovin kum 2019 khan BJP lutin Assembly poll ah Colaba seat atanga thlan tlin a ni zui a ni.
Lawyer niin politics a luhchilh hma pawhin ukil nihna atanga sum lalut teuha sawi a ni a. A puzawn chu senior NCP leader leh legislative council chairman hlui Ramraje Naik-Nimbalkar a ni.
Eknath Shinde sorkar July 3, 2022-a din a nih khan Narwekar chuan vote 164 hmuin Speaker atana thlan tlin a ni a. January 2012-a Nana Patole ban hnuah Speaker post chu ruak rengin a awm a ni.
May 11 khan Supreme Court five judge Bench chuan Chief Minister hlui Uddhav Thackeray-an disqualification petition a thehluh a ngaihtuahnaah court chuan 10th Schedule (disqualification on the ground of defection) hmangin hma a la nghal ngawt thei lo a ti a. Thil danglam bik court inrawlhna tur thleng a awm loh avangin Speaker chuan a hun a tihah disqualification petition-ah hian thutlukna a siam tur a ni, a ti a.
Apex court chuan Narwekar an Shinde Group candidate Bharat Gogawale chu Shiv Sena Chief Whip atana a ruat chu ‘dan kalh’ a tihsak bawk a. Political party leh legislature party danglamna a awm thu sawiin ngaihfin chi a ni lo a ti bawk.
Shiv Sena party tena a tira Chief Whip atana Sunil Prabhu an ruat chungchangah mithiamte chuan Narwekar chuan Prabhu an MLA 16 te laka whip a tihchhuah khum te chu disqualify hmasak phawt an ngai tiin P.D.T. Achary, former Secretary-General of the Lok Sabha chuan a sawi a.
“Speaker hian Sinde faction lam MLA te disqualify mai bak tih theih dang a nei lo. A chhan chu Supreme Court-in whip chu political party, i.e Uddhav Thackeray kaihhruai party in an kalpui theih a ni a ti a. Chumi awmzia chu Shinde faction te whip hnawltute chu disqualify mai an ngai a ni,” tiin a sawi.
Nikhil Wagle, political analyst leh author chuan, “Supreme Court-in chiang takin whip selection chu dan kalh a ti a, a kalpui dan zawng zawng pawh dan kalh tihna a ni a, hei vang hian Speaker chuan duhthlan tur dang a nei lo. Mahse, Narwekar hi tan lam nei a nih avangin thutlukna a siam mai duh lovang a, Thackeray te hian Supreme Court ah an zualko leh a ngai ang,” a ti bawk.
Narwekar hi court-in a ngaihtuah hmain London-ah a lo zin sa avangin May 15-ah India lut leh chauh tur a ni.
Maharashtra Speaker-ah mit fu thup mek
