Belgian Sacha Feiner, kum 43, hian a lei hmangin Guinness World Record a lo siam tawh a, a lei chu a lian lai bera tehkualin 17 cm (inches 6.69) a lian a ni a, 2024 khan khawvela mipa zinga lei lian berah GWR-in a lo puang tawh. Tunah pawh a lei hmangin record a siam leh ta a, tun tuma a record chu minute khat chhunga mahni hnar liak ngun thei ber a ni ve thung! Mahni hnar liak pha lo hi mi tam zawk fê kan ni ngei ang.
Hetiang record te mai mai lo tihsak ngawt tur a ni bik lo, veng khatah pawh ‘ber’ nih hi thil har a ni a, khawvel huapa ‘ber’ nih theih hi chu eng kawngah pawh a ho mai mai tihngawt chi a ni lo. Sacha hian minute khatah a leiin a hnar chu vawi 421 a liak hman a (a lei hmawrin a hnar a tawk) a, record a siam. A hmaa hetiang record chu Brazilian Renato Bayma Gaia’n 2023-a a siam niin, minute khatah vawi 334 a liak hman.
Sacha chuan, “Ka naupan lai atang tawhin insiamchhiat vak vak ka ching thin a, ka leiin ka hnar ka liak thei tih pawh naupan lai atangin ka hre tawh a, hei bakah hian lei han tikhawr pum dan ka thiam riau a, chu chuan lei tehkuala lian ber record pawh ka siam phah tawh bawk,” a ti.
Sacha hi movie director, scriptwriter leh special effects/puppets creator a ni a, animated puppet feature lam a buaipui mek a ni.
Sacha chuan mahni hnar liah chu thil harsa ni lo mah se rang taka mahni hnar han liah zeuh zeuh chu thil harsa ve zet mai leh ngaihtuahna sawrbing ngai tak mai a nih thu a sawi a, “Ka inzir tlauh tlauh hnuah record ding lai ka khum thei ta hram a ni,” a ti.
Mahni hnar liakin record siam
