Mahni kutkawih ngeia billionaire ni thei naupang ber MrBeast
YouTuber Jimmy Donaldson, MrBeast tia hriatlar chu billionaire zinga chhiar tel a ni ta a, a hausakna hi dollar tluklehdingawn a tling ta niin Celebrity Net Worth chuan an tarlang. MrBeast hi kum 27 mi chauh a la ni a, tihian tuna khawvela billionaire zinga a naupang zual pariat zingah langin, mahni kutkawih ngeia billionaire ni thei naupang ber a ni bawk.
Ro khawm avanga billionaire ni thei an awm a, chutiang ni lo, mahni thawh rah seng vang liau liaua billionaire an awm bawk a, MrBeast hian a tleirawl lai atanga YouTube buaipui tanin, North Carolina a a chenna atangin video te YouTube-ah a post thin a. 2017 khan ‘I Counted to 100,000’ tih video dahin, he video siam nan hian darkar 44 hun a hmang a, vawiin thlengin vawi maktaduai 31 en a hlawh tawh. Hei hi YouTube-a a rawn lar chhuah tanna a ni ta a ni.
2024 khan MrBeast hi Forbes Top Creators list-ah No.1 niin, Forbes-in a hausakna ni a an tarlan chu dollar maktaduai 85 a ni a, mahse, court document atanga a landanin a food brand atanga a sum hmuh chu 2023-ah dollar maktaduai 223 niin, 2024-ah chuan dollar maktaduai 700 a tling tawh.
A sumdawnnaah hian Beast Burger pawhin hriat a hlawh viau a, 2020-a a din, delivery chauh ti thin fast-food chain hmangin thla khatah a tlem berah dollar maktaduai 2.3 a la lut niin an chhut. MrBeast hian chocolate bar company Feastables a din bawk a, hei pawh hian thla tin dollar maktaduai 10 thawk chhuak angin an chhut bawk. Hei bakah ian Juice Funds co-creator niin, crypto leh tec space lama pawh huang zauh zelin, Bitcoin leh CryptoPunks NFT te pawh a nei nual a, Coinbase, Refinable leh XCAD Network te pawh a sum hmuhna lian deuh zingah a tel.
MrBeast hian thilpek leh thilsem lam pawh a uar khawp mai a, car 100 chuang a donate tawh bakah a video pakhatah phei chuan dollar maktaduai a sem ral a, Team Trees nen thawhhoin thing tiak maktaduai 20 an phun tawh bawk.
MrBeast ian 2016 te kha chuan YouTube-ah subscriber 30,000 vel chauh a la neia, mahse, hemi kum tawp lamah college bansanin YouTube atan a hun tam zawk a hmang tan ta a, 2021-ah chuan creator zinga YouTube-a thang chak ber niin, subscriber maktaduai 37 kum khat chhungin a nei hman! June 2024 khan YouTube-a subscriber ngah ber a ni der tawh a, tunah hian YouTube subscriber maktaduai 397 a nei mek a ni!
Mahni kutkawih ngeia billionaire ni thei naupang ber MrBeast
