Residential Institute & Training Centre (RITC), Training Centre for Specially-Abled Person (SAP) leh State Social Welfare & Rehabilitation Centre (SSWRC) atanga training chhuakte hnenah puanthui khawl, pheikhawk siamna bungrua leh Vocational Training Centre certificate sem a ni.
Hun hmanpuitu Social Welfare & Tribal Affairs, Women & Child Development minister Lalrinpuii chuan Social Welfare & Tribal Affairs kaltlanga a thlawna puanthui zirna buatsaih a ni leh eizawnna tluantling neih phah engemawzat an awm chu ropui a tih thu a sawi a. Training dang leh hmachhawpte puitlin a nih theih nan theihtawp chhuah tum a ni tih a sawi. Training chhuakte chu mahni ngaihtuahna hmanga thil danglam leh tha siam chhuak thei tura ngaihtuahna seng turin a fuih bawk.
Training Centre neih ang angte thuamthata tihchangtlun zel tum a ni, tiin, Bana Kaih policy hnuaiah mahni kutkawiha eizawngte sawrkarin puih zel a tum a. Harsatna leh mamawh an neihte a hnena thlen hreh lo turin a chah.
Hmanpuitu dang, Social Welfare & Tribal Affairs, Women & Child Development joint secretary Zonunthari chuan nakin zela enlet theih turin department chanchin leh hmalakna mumal taka dahthat zel a pawimawh tih a sawi a. An department chu nausen atanga tar thlenga enkawltu, chanhai leh vohbikte chawikan leh chhawmdawl kawnga hma latu pawimawh tak a nih avangin thawktute chu an rawngbawlna thahnemngai taka hlen chhuah zel tum turin a fuih.
RITC trainees zinga mi 25 chu state fund atangin puanthui khawl leh certificate hlan an ni a. PMKVY kaltlangin mi 21 hnenah puanthui khawl leh certificate hlan a ni bawk. SAP trainees hmeichhia 27 chu state fund kaltlangin puanthui khawl leh certificate hlan niin, PMKVY kaltlangin mi 23 puanthui khawl, certificate leh stipend hlan an ni. Heng bakah hian mipa trainees 9 chu state fund kaltlangin puanthui khawl, certificate leh stipend hlan niin, mi 5 hnenah pheikhawk siamna bungrua leh certificate hlan a ni. SSWRC atanga VTC zir zo mi 28 hnenah certificate hlan a ni bawk.
Mahni kutkawiha eizawnna tur zirtir
