Lungleia khawtlang hruaitu, kohhran hruaitu leh zirna in nen World Malaria Day denchhenin Ningani khan hmalak dan tur sawi ho a ni a. Kumin thupui chu “Accelerating the Fight Against Malaria for a more Equitable World” (Hriselna kawng a intluktlan nan, Malaria tibo tura chak zawka hma lak) a ni.
Kaihruaitu senior chief medical office Lunglei Dr LC Liana chuan India ramah malaria a hluar hle a, mihring tam takin malaria vangin nunna an chan tawh a. Mizoramah pawh malaria a hluar a, Lunglei district chu a vei tamnaah pahnihna a ni, tiin a sawi. Health deparment chauhin a do thei loa, mipui tel lo chuan kalpui a harsa, tiin, a huhoa hma lakpuiah a sawm.
Lunglei district (undivided Lunglei leh Hnahthial) chhungah khua 193 awmin mihring 70825 an awm a; Malaria Technical Supervision Unit 5 – Hnahthial, Buarpui, Lungsen, Tlabung leh Bunghmun a awm. Kum 2022 ah malaria vei 2890 awmin kum 2023-ah 4950 an awm a. 2023 January – December chhungin malaria vangin Lunglei district-ah nunna chan pathum an awm.
Kumin chhunga hmalak tawhna leh hmalak tur chu, IRS Deltamatherine hmangin khaw 187 tuam tum a ni a; khaw 174-ah LLIN thosilen semchhuah bakah IRS khaw 6-ah thosilen chiah a ni ang. Self help group leh NGO nen tuichhe tlinna leh thosi pian theihna tihfai a, dengue laka invenna lama hma lak a ni ang. Malaria tamna hmunah khawtlang hruaitu, NGO leh mi pawimawhte nen sawiho bakah ICMR-in Tlabung lamah malaria thosi leh damdawi thlengin a zirchiang a ni.
Lunglei district-ah January – December 2023 chhung khan dengue sample 2188 test-ah 179 chuan an vei tih hmuhchhuah a ni.
Malaria tamna Lunglei district-a malaria do ho dan tur ngaihtuah
