Delhi-a Congress leadership ten NITI Aayog meeting atanga a chhuah tauh chungchangah West Bengal Chief Minister Mamata Banerjee an thlawpna an sawi lan laiin State Congress president Adhir Ranjan Chowdhury chuan Banerjee chuan dawt pawh a sawi a ni thei a ti ve thung.
July 17 khan Banerjee chuan NITI Aayog meeting neihnaah thusawi duh a neih a sawizawh pawh phalsak lo leh a microphone tihtawpsak tia sawiin meeting a chhuah tauhsan a ni.
“Open democracy a ngaihdan inang lo leh thlirna inang lo awm thin te hmui phuarsakin a awm a ni. He meeting hi a lem a ni ber mai. West Bengal CM an tihdan hi pawm theih a ni lo” tiin Congress general secretary (communication) Jairam Ramesh chuan a sawi a ni.
Banerjee pawhin amah chauh chu Opposition rorelna state atanga Chief Minister tel awm chhun niin Opposition pum aiawha tawng a nih thu a sawi. Trinamool Congress te hi Opposition Indian National Developmental, Inclusive Alliance (INDIA) bloc a tel an ni.
Hetih lai hian Trinamool Congress chairperson sawiseltu langsar ber pakhat chu Chowdhury a ni a. Kum 2024 Lok Sabha inthlana Baharampur-a Trinamool candidate Yusuf Pathan hneh lotu ni bawk leh West Bengal-a Congress leh Trinamool Congress te thawhho theih lohna chhan bera an puh ni bawk a ni.
Chowdhury chuan Inrinni khan President Droupadi Murmu hnenah lehkhathawnin West Bengal chu ‘rorel mumallohna’ a ni mek tia sawiin State a ‘law and order’ tha taka lekkawh a nih theih nan President chu a ngen a.
“West Bengal-a dan leh hrai lekkawha civility tha tak kalpui a nih theih nan inrawlh turin ka ngen che a ni. Mimal takin State-a ruling party worker leh anmahni thlawptute chet lak dan hi tha ka ti lo takzet a ni,” tiin MP hlui Chowdhury chuan a ziak a ni.
Chowdhury chuan Sandeshkhali violence, Lok Sabha inthlan hmaa Murshidabad district a inbeihna te leh tun hnaia Jalpaiguri a party worker te thihna te chu ziak langin ‘State ah Opposition tan hmun a awm ve lo’ tiin a sawi.
Kar kalta Ningani khan north Bengal a Maynaguri ah Congress worker Manik Roy chu thah niin a thattu nia rinhlelh Trinamool Congress thlawptu chu man a ni zui a ni.
Mamata Banerjee vangin Congress leader-te ngaihdan inang lo
