Mizoram Agricultural Marketing Board (MAMB) chu an chairman, chief minister Lalduhoma kaihhruaiin Thawhtanni khan an thukhawm a, hmuhphiah leitu tumte nena inremna ziah dan tur an duang. Hmunphiah lei thei tur zawnna (expression of interest) neih tawhna atanga sawrkar rate bituk zata lei thei firm-te nen season khat chhung inremna siam an remti a. Buyer-ten an lei theih bak zawng chu sawrkarin lei mai se, tiin thutlukna an siam.
Leitheituten sawrkar warehouse an hman theih dan pawh duan a ni a, warehouse hman theih hi a tul zual chei mek a ni. A hmang duh, empanelled buyer-ten a hming chauha luahman pe in an hmang thei ang. District level (DAMC) atanga secondary collection centre atana hman theih list an thehluh pawh pawm a ni bawk.
Sawrkarin a lo sawi tawh angin, thlai thar a lei turte hi support price pek ngai loa kalpui theih (support price aia sanga hralh theihna) ah chuan zalen taka lei leh hralh theih (open market) reng a ni a. Support price hnuaia luhpui a tul hunah sawrkar ruahmanna anga kalpui tur a ni thung. Hmunphiah hi a hring chu support price pek a ni dawn loa, a ro chauh support price siam a ni. Sawhthing leh aieng hi sawrkarin support price a pek theih hun chhung chu January – May inkar a ni a; hmarcha leh hmunphiahah January – March a ni.
Support price pek ngai lo chu zalen taka lei leh hralh kalpui theih reng niin, support price pek ngaite erawh secondary collection centre-ah zel pek tur a ni. Tunah hian district tinah District Agricultural Marketing Committee (DAMC) hmalakna in secondary collection centre/ auction centre siamfel mek a ni.
Sawrkarin support price a pekna tur chu secondary collection centre-ah zel hian a ni anga, khaw hrang hrangin sawrkar rate siam aia tlawma an khuaa an hralh duh pawhin phal vek a ni. Chutihrualin, support price chu sawrkarin a ruat collection centre-ah zel tur a ni a, a phurh thlenna transport cost chu sawrkarin a sawi tel lo a, society-ten a tul anga an buaipui tur a ni.
December 6 khian Baptist Centre Falkland-ah MAMB leh Agricultural and Processed Food Products Export Development Authority (APEDA) tangdun chuan buyers-sellers meet an buatsaih dawn a. Foreign atangin company 13 leh India ram chhung atangin company 22-in an tel tur thu an tichiang tawh. Hemi inbuatsaihna pawh hi sawi a ni a, tih tur tul la awmte bawhzui dan tur an duang.
MAMB-in hmunphiah lei tumte nena inremna ziah dan tur duang
