Mamit atanga dialysis khawllakchhuah chhan an sawifiah

Mamit atanga dialysis khawl
lakchhuah chhan an sawifiah
Tunhnaiah Mamit District Hospital-a dialysis khawl pali dahfel tawh chu district danga hman turin sawnchhuah tum a ni a. Mamit lamin lakchhuah an phal loh thu an lo sawi tawh a ni.
National Health Mission Mizoram mission director chuan lakchhuah a ngaih chhan sawifiahin, National Health Mission (NHM) hnuaia Pradhan Mantri National Dialysis Program ah district tina dialysis centre din a, dialysis avanga mipui sum sen tihtlem chu a thil tum zingah a tel a. Mizoram pawhin hemi bawhzui hian district tin (district thar pathum tel rih loin) ah dialysis centre din tumin hma lak a ni.
Aizawl leh Lungleiah chauh dialysis centre awm thin kha he hmalakna avang hian Champhai leh Kolasib-ah dialysis centre din belh a ni tawh a. Mamit, Siaha leh Lawngtlaiah pawh centre din belh tumin hma lak a ni.
Mamit, Siaha leh Lawngtlai tan tunhnaiah CSR atangin dialysis khawl Mizoramin a dawng a. Heng khawl hi kumin April khan an awmna hmun turah dah a ni. Dialysis centre din tur hian dialysis khawl bakah, RO plant (tui tih thianghlimna) bun hmasak a ngai a; a hmunhma zau tha ve tak, RO plant bunna bakah dialysis tihna tur ward, khawl neih zat mil zela zau neih a ngai bawk. CSR atanga dialysis khawl dawn hi a petuten duh dan fel tak an nei a, khawl dawn hi an deliver ruala install mai theih tura a hmunhma lo peih vek tur a ni.
Mamit tana khawl pali dawn hi building hluiah hmun a awm loh vangin building thar luah huna install tura ruahman a ni a. Kumin March khan CSR kaltlanga a petu (IOC Ltd) chuan rawn deliver a, install nghal a duh a. District Hospital building thar hi luah hman a nih tak loh avangin June 15 thleng nghah a phalsak a ni.
Dialysis khawl petute hian installation report leh utilisation certificate an thehluh a ngaih tawh avangin Mamita khawl install loha awm reng hi district dang, install theih nghalna hmunah dah sawn rih mai tura an tih angin, a hmunhma peih sa vek tawh Champhai leh Serchhipah dah mai turin ruahman a ni.
Khawl petu atanga tunhnaia lehkha an dawnah, dialysis khawl hi July 5 aia tlai loa install ngei tura tih an ni a, install theih loh chhan chhuanlam neih a thiang tawh lo tih an rawn ziak tel a. July 5 hma hi chuan Mamit District Hospital-ah dialysis khawl bun hman ngaihna a awm loh avangin, district dang, khawl bun nghal theihna hmunah Mamit District Hospital tana lo tih tawh khawl hi sawna install mai a ngai ta a. Hei hi Mamit district mipui leh NGO pawhin an hriatthiam pui a ngai tih a sawi a ni.
Mamit District Hospital-ah hian dialysis centre din tura hma lak zel niin, heta hman tur RO plant pawh Health department chuan Mamit-ah dah tawhin, reprocessor machine lei mek a ni a. Dialysis khawl hi CSR atangin dil leh nghal a ni. Mamit District Hospital inpeih hunah dialysis khawl bun nghal thei turin tun atang hian inbuatsaih mek a ni tih a sawi.