Mamit College-a order siam sut
turin tlawmngai pawlten an ngen
Govt Mamit College-a Geography department tihtawp tum chu an duh loa, order tihchhuah tawh chu sut turin sawrkar thuneitute an ngen tih Mamit NGO Coordination Committee chuan an sawi.
NGO Coordination Committee (NGOCC) Mamit bakah Joint Village Council, MJA leh all political party thuchhuak chuan, Govt Mamit College-ah hian kum 2020 atangin Geography department hawn a ni a. A tirah thawktu hlawh hi Mamit bialtu MLA Fund-a mi pahnih rawih niin, kumin atangin MLA fund-a chhawr chu tih tawp a ni a; Higher & Technical Education department-in casual teacher (asst. professor) pakhat a chhawr bak chu Govt Mamit College-a thawkte thawhkhawm atangin midang pakhat rawih a ni tih sawi a ni.
Kumin July 29-a H&TE minister hoa he department, DP&AR leh Finance department thukhawm chuan college thenkhat rualin Govt Mamit College-ah pawh Geography department asst. professor post 5 siam nise tiin a rel a. Nghakhlel taka an lo thlir laiin November 14 khan H&TE department chuan DP&AR thu bawhzuiin Govt Mamit College-a Geography department titawp tur leh session thar atang chuan admission la tawh lo turin thupek a chhuah tih a sawi a ni.
‘He college-a lut zirlai engemawzat luh zawmna tur nei loa tangkhang an awm hi NGOCC, Joint VC, MJA leh all Party chuan rem a ti lo a ni,’ thuchhuah chuan a ti.
Geography department tih tawp tumna thupek chu a rang thei anga sut turin thuneitute an ngen a. 2024 December 20 hmaa sut a nih loh chuan, hawn chhunzawm a nih theihnan an thiam ang angin hma an la dawn tih an sawi.
Mamit College-a order siam sut turin tlawmngai pawlten an ngen
