By Lalhmangaiha Sailo
Holy Cross Bakery
Ph : 9436360275
TAR LUNGLENG : Kum 60 (sawmruk) dawn liam ta Mamit kan vanglai Community Development Block hawn tirh lai, in 100 zet chauh an nih hun lai leh motor luh tirh chanchin te awmkhawhar lunglen changin alo lang thin a. Hetih hun lai khawtlang hruaitute leh thiante ka thawhpui thin ten, mual min liamsan zo tawh bawk nen, tun hun thangtharte tan lah ngaihnawm an tih lam a nih hmel si lo, a hre pha tlem azawng te leh an tu leh fate tan erawh an lung te pawh a leng ve mahna tiin kan ziak ve leh thlarawk thin a.
Inthlan a hnai a, politic lam hawi leh articles ngaihnawm leh ril tak tak kara lo in zeh ve thin chu ka inthlahrung deuh na in, ziahtur ala awm lo maw ti tawk lo awm ve khanglang nen, chu bakah Dt 17.8.2023 Aizawl Post-a Pi Zoremi Hmar Zote-in TAR KHAWHAR tih a rawn ziah khan min tiphur deuh bawk nen TAR LUNGLENG tiin kum 50 zet liam ta, Mamit dai vela ka chet dan te ka’n sawi mai mai teh ang.
Kum 50 (Sawmnga) hma lam kha chuan Mamit Tlangdung “Vachhe Tlang dung” an tih thin khu Ngawpui chhah tak Chhura rual Ngiau, Char leh Zihnghal leh Bul thinglian pui puiin a khat a, Ngawpui hnuaiah Hruipui, Thilte, Thilthek, Kawihrui, Sairil, Leihruisen leh Selu chenin a awm a. Thei vawkpui leh Thei sehret thlengin dai bul hnaiah a awm a, Vahrit, Ramar leh Ramparva ten an tlan a, thlasikah Ngiau rah tlan, Kawl hawk, Vapual leh Vahai chen in an thum huk huk thin. Bullut, Vahui, Tawllawt, Tukloh leh Vate ho tlan tur Bul, Chawmzil, Phuanberh, Kelbuh leh Saphut te dai bulah a tam khawp mai.
In leh lo dina chhungkaw bul ka tanna hmun a ni a, Pasaltha silai nena ram vak chi ka ni lo na in, pasalthate hnungzuia Sazuk, Sanghal, Sakhi chen a hlawhtlinpui chang erawh ka nei ve thin. Dai vel erawh ka hrut nasain hetiang te hian hun ka hmang thin.
THANGTHLENG KA KAM :
Ni khat chu kan thenawmpa Pu Ralliana Buh phur haw hian Tuklo hi a rawn khai haw teuh mai a, ka lo leisak nual a. Engtia in man leh khawilai hmuna in man nge tih dilchhut angreng takin ka lo zawt a. Thingpui no dawm chungin, “Sihhung Zotui bulah sawn Saphut rahtlan Thangthleng ka kam a, buh phurh pah hian ka rawn en hawng a lawm mawle,” a ti a. Ka chhinchhiah ta ran a, kum thar lamah kam ngei turin a rah sen tirhte atanga hauh (hum) hmasak ber ka tum ta ran a.
Kum thar September thla tirah ka ramkal in, Saphut kung chu ka va hmu ta, Vaimim fang tia thelh hian alo sen tawh a, Saphut kung liantak sang tak a ni a, ka hum zui ta a, a lawn pawh a awlsam lem lo, an lo kam fo tawhna thin a ni a, a zar hmawr te an thlak kawlh a, a lo chawr tan leh a rah kher mai. Helai hmun hi tuna Deputy Commissioner, Mamit Office thlang tlak lam Sihhung Zotui khur thlen hma, kawng chunga awm a ni, tunah chuan khawlai ang mai a ni tawh. Phur takin Thangthleng ka puah tan a, a hruiah parachute hrui zai ka hmang a, ka puah zo thawkhat a, ka va hum ta. Thang panga vel chauh kam theihna turah, Thangte ka dawh kalh tuk a, a zar hmawr tak thlengin thang sawm zet ka kam a, thalngulah Rawnal leh Rawthing Fek ka hmang a, a rul ve mai lo a, a tha khawp mai. October thla tawp lam a hmin hma atangin Savain an rawn hel tan a Tuklo hi a tam ber an ni.
November thla kan kai a, a hmin tan, ka inpuahchah hma bawk a, ka awk thei kher mai, nikhatah vawi hnih, zing lam leh tlai lamah ka en thin a. Thang zawng zawnga a awh kim chang te pawh zuk awm thin a. A bul hnaia Saphut kung te deuh te leh Phuanberh rah te pawh chu ka kam belh ta zel a. Tawllawt leh Mute thlengin ka awk a, a hnuai lamah Varihaw thawm ka hriat thin te pawh Beai leh Sahdal thang hnih lek kamin ka awk a. Mute leh MuArla hian han awm loh hlek chhung hian thangawk an lo ei thin a. Thangthleng dawhah Tuklo ka phuar bet sauh sauh a, thuk takin a dawh ka kam sang a, a hnuai lamah biru takin ka enthla a, thawklehkhatah Mu-Arla râng ruk mai hian, chak tak maiin a zuk tham chu le, a ti fuh lo kher mai, thangngul a khauh tha bawk a, Mute pakhat ka awk bawk a, hemi hnu hi chuan min tibuai ta lo.
Season khat chhunga thangthleng kam ah, kei aia sava awk tam hi awm tak maw!!!
Thla hnih chhung ka vil a, Tuk lo ringawt pawh 500 (zanga) zet zuk awk ia mawle, a hmul pawh naupang lukhama siam tham zet zuk ni a. Tun hnu hian, a hmun leh hma te hi kal remchan nikhua te hian ka zuk fang thuak thuak thin a, lungte hi zuk leng phian thin a, TAR LUNGLENG tih takah.