Lalhmangaiha Sailo
Holy Cross Bakery
9436360275
BEAI LEH SAHDAL THANGKAM INTIHHMUH
Mamit kan Vanglai tih lo chhiar thintute chuan tun hma kum 50 hma lam te kha chuan Mamit khua hi Ngawpui chhah takin hual velin Ramsa leh Sava te hi an tam hle thin a ni tih a hriat theih awm e. Rambuai hnu 1969 Khawkhawm thleng khan a la tam viau a ni, kan thian A. Lalliana, Dr. Thiamsanga Ex MLA puzawn phei kha chuan Office kal pah te hian tuna Bazar liam Pu Ralhnaia In bulah te khuan Vahrit leh Ram Ar te Sahdal thangkamin a rawn awk fo thin.
Tuk khat chu Pu Kapthanthuama F/o Ruatkima Ex Minister, leh Pu Kaphranga te Sikul kal turin kan kawmthlang zawn an rawn thlen lai chuan Beai leh Sahdal thangkam chungchang thu hi an rawn sawi phei mawlh mawlh a, anni pahnih leh Pu Lianhnuna F/o Mawitea leh Pu Thanzauva Er. Zira MLA pa te nen Pu Chalhuaia Sikul – Mamit Primary Sikul I a thawk ho an ni a, hetih hun lai hian Sawrkhar hnathawk ho khan hna hautak loh lai chuhin, Beai leh Sahdal thangkam kan intih hmuh a, Kei pawh Sihhungzotui piah Suangkuang kawng thlang Ngawpuiah te sawn ka va kam ve thla rawk a, ka awk meuh lo lehnghal.
Pu Kaphranga hi Dampui khua atanga hruai khawma lo phei a ni a, Pasaltha tuai deuh Sa te pawh kap ve nual tawh a ni a, Dampui ngawpuia Sahdal leh Beai lo kam fo tawh thin a ni nghe nghe. Ani hian an sawi hawt vel a, Beai leh Sahdal thang a neihsate chu puah belhin, Dampui ngawpui tlak lam ruam Pholeng ram thlengin Thang sawm theuh an inhmingkima kam turin an inpuahchah ta a.
Beai leh Sahdal thang tam tawk ak chhuakin Pu Chalhuaia Leader ho chuan phur zetin Dampui ngawpui lam pan chuan an chhuak ta tham tham a, Hetih hun lai hian Pu JC Sengluaia MCS chu SDO Civil a ni a, tuna Police ho hmunpui kawngchhak lamah hian Quarter lian tak a luah a, an liam tur chu Varandha atang chuan lo hmu in, khawi lamah nge in kal dawn, thingpui te pawh rawn in teh u tiin a lo ko va. Pu Sengluaia thiannu Pi Lalpuii awm lai niin thingpui te chu an in hova. Pu Kaphranga chuan “Keini ho hi khaw hran hran atanga sawi khawm a helai hmuna thawk ho ta hi kan ni a” kan in sawi phur in “hawh teh u, Beai leh Sahdal i kam ho ve teh ang u” tiin kan tum thut alawm mawle, kan kalna tur hi Dampuia kan awm lai a ka ram vah thinna ber a ni bawk a, ngawpui nuam tak a ni a, Sava a tam a tun hunah hian, tu khaw khain an tlawh meuh lovang, a phurawm khawp asin an tih chu.
Pu Sengluaia chuan, e!!! Kei pawh member ah min telh ve teh u tiin a phur berah tangin chawfun leh chempui ipte pui akin a insiam ve ta a. Dampui ngawpui thlengin a motor-in a va thlah a. Thang tam fe an va kam ta. Khawtlanga ngawidawh angin, an en apiangin, an in chan chhawk a. An awk thei viau nain Pu Kaphranga vanglai erawh an tluk lo an ti.
Mak angreng tak mai an sawi thin chu maw!!! An hotupa Pu Chalhuaia puala an en ni tawh chuan – Sa te (Sanghar) te hian thangawk chu an lo laksak ziah thin, a zei lo ber Pu Kapthanthuama leh Pu Liahnuna te pual tura an en ni tawh chuan a lo awk tha phian thin zuk ti a.
Chawlhkar hnih dawn an kam a an sut ni chuan Pu Sengluaia’n thingpui buatsaihin a thlahna “Farewell to Beai Sahdal” kam ten hlim takin an hmang a ni. Heng kan hotute hian mual min liamsan vek tawh a, an hun lai Mamit kan vanglai chuan an hlim thin teh a sin, anmahni hriatrengnan ka hriat ang ang ka rawn tarlang a nih hi. Mamit kan vanglai tar lungleng nih manah.
INRAL PALH
Mamit kan vanglaiah hian a hlimawm leh ngaihnawm lam deuh hlir kan sawi lai hian, hlimawm lem loh lam pawh hi sawi tur a tam khawp mai. |hangtharte hriat atan tlem azawng in tarlang teh ang.
Kum 1959 Favang laiin Pu Lalhmingthanga Hmunsam Veng pa chu Dampui Ngawpui a Kawlhawk leh Vapual kah tuma a veh lai chu, a thianpa Lianzela chuan Sakhi emaw tiin a khup dinglamah musep no 4 in ava kap chu, in bawihsawm zuiin Aizawl Civil Hospital-ah zawn chhoh pui vat a ni a, Pa tuar chhel tak a ni a, a khup bawr atang hian musep tam fe an zai chhuak a, mu engemaw zat zaichhuah loh vin a dam pui a. Pa rual pawl tak mi a ni bawk a, a hmingpui an tam a, Lalhmingthang Kebaia ti a lam thin a ni zui ta nghe nghe a ni. 2022 khan Kum 80 ral kaiin mual a liam a ni.
PU SELDINGA : 1961 kum tirah ani hi Mamit khaw hlun leh Lal Mual Kila awm Dawrkai hmasa a ni a, Pasaltha ramvak thin niin a upat deuh hnu thlenga Sakap thin a ni. Tlai khat chu an kawmchhak liam mai Behliang kawng peng thlanga a Sakhi chang Thingkaka a thu chu, Tv Lalmuana chuan hmusualin Ngau emaw tiin a kap a, a ni Pasaltha tuarchhel tak chuan “Min kap alawm le” tiin a chhuk thei hram a, an in thlenpui hnu rei vak lovah a thi a ni.
PU VANLALCHHUNGA : Ani hi Pu Seldinga fapa, Mamit Village Council President a ni a, Mamit CD Block din tirh a Officer te leh Staff te lo chiauautu ber thin a ni. Khawtlang thil pawimawh ti a a Aizawl kal chu 1966 Ram buai Aizawl inkahah khan Sipai kuta thi zingah telin Mamit khua atanga Ram tana Martar hmasaber a ni hial awm e.
ROBULA : Ani hi Mamit venghlun Pu Thanchhunga Fapa, Tlangval hmeltha tak a ni a, Phaizaua an huan Tut kam zawl thinglera PAN hnah a lo malh malh lai chu, Luangpawl tlangval ramvak chuan hmusualin, Zawng emaw tiin a kap a, a PAN hnah lawh ipte pui nen chuan tla thlain ka pawh chhawn lovin a thi a, anni hi an zep rei deuh avangin thubuai a kal thui phah viau a ni.
SEIKUNGA LEH SAVAWM IN SUAL
Kum 1976 hian Zotlang ngawpui tlak lam Pholeng ramah Pu Seikunga te chhung leh thenawm tlem azawngin Lo an va nei a, a va pen hleh deuh avang hian feh kal vel tan pawh a huho deuhva kal loh phei chu khawharthlak tak a ni. Pu Seikunga hi Pasaltha a ni a, a feh haw leh kal lam te hi mahnia kal mai thinin Muzuk fei hi a hawl thin a ni.
Favang lam hnaih a ni tawh, tuk khat chu an tul deuh bawk a hma deuhah MUZUK Fei hawl chungin feh turin a chhuak a, feh kal hmasaten an um phak hma Dampui ngawpui phei a lut chiah chu, Kawngkual laiah Savawm sum 5 zet tur nen an intawk phut a, Savawm chuan a rawn bei phei, anin a Muzuk fei chuan a zakthlarah a lo chhun. Pu Seikunga ke phet tlu chu Savawm chuan rawn nang chingin a hmai leh a nghawngah te a seh a, huk rum rum chungin a Muzuk fei chu tal putin Ngawpui lamah a tin san a, an thawm hria a feh kal hmasa ten hmanhmawh taka an va thlen chuan a lo chatthla hman a ni.
Savawm hliam um hian Assam Rifles ho te punin LMG Silai nen kan umzui a, High Sikul naupangte nen Ni hnih kan um hnuin Tut ruam lamah a liam a, rei fe hnuah a ruang ni ngei tur hi Luangpawl ramah an hmu a ni.