Mamit kawng siamna tur ngen
Mamit Joint Village Council member-te chuan Union minister of state Ministry of Road Transport & Highways Ajay Tamta chu New Delhi-a a office-ah MP Lok Sabha Richard Vanlalhmangaiha hoin an hmu a. National Highway 44A/108 siamthat thuai a nih theihnan re-tender sanction thuai tur leh, Mamit district kawngpui hrang hrang siamthat a nih theihnan hma laksak turin an ngen.
Mamit VC-te hian Union MoS hnenah NH44A/108 chu thangkhat lian dawn siam a nih hnuah pawh siam zawh a la nih loh avangin mipuiin nasa taka an tuar a, a bikin furah inkalpawhna kawngpui a that loh avangin buaina leh harsatna an tawk nasa thin tih an thlen. Mamit district chu aspirational district a nih angin ngaihpawimawh a ngai tih thlenin, district kawngpui a that loh avangin khaw kar kawng inkalpawh a harsat bakah oil palm leh thlai dang phurhchhuah a harsa a, thil man a san phah thin tih an thlen a ni.
Thal chhunga NH44A/108 siamna tur sum sanction a nih loh chuan nakum furah tun aia a chhiat nasat dawn avangin tun thal chhung ngeia a siamna tur sum, department lamin cheng vaibekchhe 166 estimate an siam chu sanction thuai a nih theihnan hmalak sak turin an ngen. Hei bakah hian Mamit district-a kawngpui dang, NH No.6 (Mamit – Bairabi) hna tan thuai a nih theihnan, NH44A/108 existing road siamthat lehna tur sum sanction thuai tur leh, khawthlang kawngpui tha lo siamthat a nih thuai theihnan an ngen a ni.
Mamit kawng siamna tur ngen
