Mamitah museum thil hlu phochhuak
Art & Culture department leh All Institutions Mamit District buatsaihin Thawhlehni khan Mamitah Museum & Records Exhibition cum Book Sale neih a ni a. Bawhrsap mawhphurhna la lailawktu, DRDO Mamit project director Malsawmzuala’n a hawng.
An kawtkaia an hmuh mai theih loh thil hlui an hmuh theih tura chhawpchhuah saktute chungah DRDO PD hian lawmthu a sawi a. Hnam ropui kan tih apiangten an hnam thil hlui, an thlahtute chanchin an hlut thin, tiin, zirlai kalkhawmte pawhin chik taka a tum leh hlutna hmu pha turin a chah.
Museum & Exhibition hi Mamit khawpui chhunga school hrang hrang tan a inchhawka tlawhna hun siam niin, vawiin – October 30 ah pawh chhunzawm a ni ang.
Museum Exhibition-ah hian Mizoram State Museum atangin museum-a thil dah hrang hrang chi 80 phochhuah a ni a. Mizoram State Archives atangin lehkhabu vang leh hlu bik 14 leh Zoram humhalhtute sulhnu (freedom fighter from Mizoram) 24 thlalak leh an chanchin tawn hrang hrang leh Sapho laka kan ram leh hmeichhiate an humna tarlan a ni. Tribal Research Institution atangin lehkhabu chi hrang hrang 49 man tlawm zawka hralh theihin chhawp chhuah a ni a, Mizoram Publication Board atangin lehkhabu 35 hralh theiha phochhuah a ni bawk.
Mamitah museum thil hlu phochhuak
