Excise & Narcotics minister Lalnghinglova Hmar hoin Thawhtanni khan Mamit district-a ruihhlo do beihpui thlak dan tur rel a ni a. A kaihhnawih sawrkar department, khawtlang hruaitu leh tlawmngai pawl hruaitu, kohhran hruaitute an tel a ni.
Mamit district chu ramri a nih avangin ruihhlo kalka leh kawng pawimawh tak a nih angin, engtin nge ruihhlo hi kan do anga, a ti mekte engtin nge kan enkawl anga, la ti ve lote engtin nge kan ven ang tih ngaihtuahna tak tak senga vei tlan a ngai tih minister hian a sawi. “Mamit district-ah hian sawrkar department leh khawtlang anga hmalakna kalpui thin a ni a, kohhranin engtin nge hma kan lak ang, tih sawiho a tul a, kan hnaivai maia ruihhlo ngaite tana ke kan pen lo a nih chuan thi mai turin kan kalsan tho, tihna a ni. Chuvangin sawrkar department, khawtlang leh kohhranten tihtak zeta ngaihtuahna senga hma la a, ke pen a tul,” a ti.
Thutkhawmah hian hmalakna tur hrang hrang sawiho a ni a. Mamita kohhran hrang hrang tangrualin ruihhlo ngaite khungkhawm a, enkawlna pek, zirna inah karkhatah ni khat tal ruihhlo do tura zirtirna pek, tihte sawi a ni. Ruihhlo do hmalakna tura rawtna chhawpa sawi zui a ni bawk.
Excise & Narcotics minister hian asst. commissioner of Excise & Narcotics staffs atanga Incentive Award dawngtu mi 8 hnenah a hlan nghal a ni.
Mamitah ruihhlo do rel Kohhran tel dan tur sawi
