Lok Sabha MP inthlanpui neih turah mipui hnena vote thlak pawimawh zia inzirtirna chu Nilaini khan District Election Office Mamit SVEEP (Systemetic Voter’s Education and Electoral Participation) kaltlangin Nilaini khan neih a ni.
Street campaign-ah hian SVEEP nodal officer, Mamit DIPRO Paul Rokima chuan MP inthlan hmachhawn turah Mizoramin a phase khatna April 19-a Parliament-ah kan aiawh tur kan thlang ve dawn tih sawiin, mipui tan leh mipui atang ngeia kan ram aiawh kan thlang thei chu democracy thatna leh hlutna a ni tih a sawi. ECI-in mipui vote neiten vote kan thlak chu a ngaipawimawh hle a, pianphunga rualbanlo /mahni chesawn thei lo leh kum upa zawk, kum 85 chuangte pawhin vote an thlak theih nan ruahmanna a siam a, thalai naupang zawk leh harsatna neilo, polling booth pan theite phei chuan vote thlak ngei chu danin a phut tih a sawi a ni.
Vote thlak pawimawhna inzirtirna hi Mamit Field kawn, Mamit Bazar Veng, Mamit Charkawn leh Dinthar Bazar Mamitah neih a ni a. Vawiin, March 28 hian Damdiai, Zawlnuam leh Kawrthah-ah neih chhunzawm a ni ang. Hei bakah hian minority area – Damparengpui, Tuipuibari, Rajiv Nagar, Silsuri, Marpara-ah te neih tum a ni bawk.
Mamitah vote thlak turin infuih
