Man.City in Arsenal an hnaih

Inrinni zan khan English Premier League 2025-26 khelh chhunzawm a ni a, pahnihnaa awm mek Manchester City chuan Semenyo goal thun hmangin Leeds United an hneh a, hmahruaitu Arsenal an hnaih leh zual. City an chak lai hian Newcastle United chu an mualah ngei Everton hneh lovin an tlawm ve thung.
Arsenal an inkar tizim leh zual tura chak mamawh Manchester City hi table hnuai lama awm Leeds United hmachhawn turin Elland Road ah an lenglut. Leeds United an hmachhawn tum hian an goal thun khawl Erling Haaland chu hliam vangin an chhawr thei lo. Haaland awm loh laiin Antoine Semenyo chuan a mawhphurhna hlenin hna tha a thawk a, an team a chakpui.
Leeds United hian an mikhual team lian lakah an khel tha viau a, goal an thun teuh thei hle. Chawlhlawk hmain goal thun theihna hun tha ngah zawk mah se si nghak chetha tak Gianluigi Donnarumma an paltlang zo lova, an hun tha neih chu uiawm takin an hlah zawn. Goal thun hmatu nih tum viau mah se an hlawhtling zo lova, goal chhuah hmasa zawkah an tang ta thung. Chawlhlawk dawn hnaih minute 45+2-ah Aït-Nour cross tha tak chu Antoine Semenyo chuan awlsam takin a pet goal a, hmahruaina a goal a thun. City hian Semenyo goal thun hmangin 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, Leeds leh City te hi an inhnehtawk zui hle. City in ball chang tam zawk mah se goal erawh an thun belh thei bik lo. Leeds United pawhin tlawm ngei tumin tan khawh bawk mah se goal erawh an thun thei bik lo. Inkhel hmuhnawm takah goal dang a luh belh thei lova, Manchester City chuan mikhual an nihna hmunah harsa takin hnehna an chang a, an mamawh point thum an hmu.
Leeds United laka chak Manchester City hian table-a hmahruaitu Arsenal an hnaih lehzual a, an inkarah point hnih chiah a tlazep tawh. Arsenal hian Pathianni zanah Chelsea an hmachhawn a, an result a zirin City nen an inkar hi a zau leh thar ve leh thung ang. City hian Thawhleh zan hian inkhel a hmachhawn zui leh nghal dawn a, Nottingham Forrest an hmachhawn ang. 16-naa awm mek Leeds United hian thawhleh zan vek hian Sunderland an hmachhawn ve dawn bawk.
An mualah Newcasle an tlawm
Inrinni zana inkhel dangah champions league last 16 khel tur Newcastle United chu an mikhual Everton lakah 3-2 in an tlawm a, an mualah an mualpho.
Newcastle hian an chung chiaha awm Everton lakah bul an tan tha lova, goal an chhuah hmasa. Everton tan hian Jarrad Branthwaite chuan minute 19-na lekah hmahruaina goal a thun nghal. Goal thun hmasa zawk an nih vangin phur viau mah se an phur rei thei bik lo. Magpies tan Jacob Ramsey chuan minute 32-naah goal thunin an si phurh a sut. Newcastle pawh hi an goal thun vangin phur mah se an phur rei lo viau thung a, goal an chhuah belh leh thuai. Gial an chhuah atanga minute hnihna lekah Beto chuan Everton hmahruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal pawh a luh belh thei lawk tawh lo. Goal a luh belh theih loh reng hnuin Newcastle United tan Jacob Murphy chuan minute 82-naah goal thunin an si phurh a sut. An si phurh an sut vangin an phur viau a, an mualah point thum hmuhin, table-ah hma an sawn ngei an inbeisei hman hle.
An goal thun vangin Magpies hi phur bawk mah se chawlhlawk hma ang bawkin an phur rei lo leh viau. An goal hnihna an chhuah atanga minute khatna lekah Thierno Barry chuan an goal thumna leh hma an hruai nawn lehna goal a thun leh nghal zat. He goal hi mualneitu Newcastle United in hun tawp thlengin an sut thei tawh lova, an mualah ngei Everton hneh lovin an tlawm zui ta a ni.
Newcastle United laka an chak nawlh vangin Everton hian table-ah hma an sawn dawrh a, khelh 28 atanga point 40 hmuin pariatnaah an inhlangkai. Khelh hmasak an la neihah tan an khawh zui chiam ang a, a chhe berah Europa League tal khelh phak tumin tan an khawh ang. Everton in hma an sawn laiin Newcastle United erawh chuan 12-na an luah ve thung.
An mualah an tlawm leh tak vangin Newcastle dinhmun a tha lo leh zual a, European competition khelh nawn leh ngei tum viau mah se khelh hmabak 10 an la neihah an chetthat viau a ngai tawh dawn a. Hmasawn tumin tan an khawh hle ngei ang.