Inrinni zana English Premier League khelhah Manchester khaw club pahnih; City leh United in hnehna an chang. Champion City in an mikhual AFC Bournemouth an sawp laiin hun tawp dawn hnaia Bruno Fernandes goal thun hmangin United an chak ve hram thung.
City an chak awlsam
Champion lai Manchester City chuan Etihad Stadium-a an mikhual AFC Bournemouth an dim lo hle a, 6-1 ngawtin an sawp. Bournemouth an sawp tum hian chanchin lawm leh lawmawm lo lam an nei. An rawlthar forward Jeremy Doku a chetthat vangin City an hlim, chu chu chanchin lawmawm lam a ni. Erling Haaland a inhliam vangin a khel tluan thei lo thung. Haaland hian thawhleh zan champions league a khel thei dawn em tih a chiang lo. Chu chu City tan chanchin lawmawm lo lam a ni ve thung.
City hian an mualah bul an tan tha a, ball pawh an chang tam. Ball chang tam viau mah se goal thun turin darkar chanve an nghah zet a ngai thung. Minute 30-naah Rodri siamsak atangin Jeremy Doku chuan hmahruaina goal a thun. City chuan kum 21 mi Doku hi nipui bazar inhawn lai khan £55.4m zet sengin an la lut. Belgium forward hi club lian City tan a khel tha chho a, a che vel a hmuhnawm thei hle. Bounremouth lakah tha takin a inlan a, goal hmahruai a thun ta hial a, goal hmahruai a thun bakah assist vawi li ngawt a nei zui bawk a, a chetha vet vet hle.
Doku goal thun hnuin City in goal an thun belh leh nghal thuai. Minute 33-naah Bernardo Silva chuan Doku chuan an goal hnihna a thun. Inhnaihchilh taka goal hnih an thun hnuin City in chetha chhunzawm a, goal dang an thun belh leh thuai. Minute 47-naah Doku siamsak atang bawkin Manuel Akanji chuan an goal thumna a thun zui leh a, si thum faia hmahruai chungin chawlhlawk an hmang.
Chawlhlawk hnu lamah City an khel tha chhunzawm a, goal thum an thun belh leh. Minute 64-naah Phil Foden chuan an goal lina a thun. Foden goal thun hnuin minute 74-naah Luis Sinisterra chuan AFC Bournemouth tan goal thunin an si phurh a sut then. Bournemouth goal thun hnuin City an khel tha chhunzawm thung a, minute 83-naah Silva chuan an goal ngana a thun a. Minute 88-naah Nathan Ake chuan an goal rukna thun zui lehin a tawp a khar a, an mualah awlsam takin hnehna an chang zui ta a ni.
An muala chak City hian hmahruaitu Tottenham lehpelin hmahruaitu thar an ni lailawk a, Tottenham nen an inkarah point khat tla zep mek mah se Spurs ai hian vawi khatin an khel tam zawk thung. Spurs in rawn lehpel leh pawh ni se Newcastle lakah Arsenal an tlawm vangin City hian pahnihna an luah zui dawn thung. Khelh 11 atanga City in point 26 an hmuh laiin Bournemouth erawh hi chuan point ruk chauh an la hmu thung.
United an chak ve ta
Old Trafford-ah an tlawm zawn hnuin Manchester United chuan hnehna an chang ve leh ta a. United hian Mimuala an khingpui Fulham chu hun tawp dawn tepa captain Bruno Fernandes goal thun hmangin an hneh hram a, point thum an hmu.
Craven Cottage-a lenglut United hian an khel chhe lo naa goal thun tur khawpin hun tha an insiamchhuah tam thei lo. Old Trafford-a an khelh hnuhnung pahnihah si thum fai ve ve an tlawm vangin an boruak a rit a, chak mamawhna sang tak an nei. Chak an mamawh luat vangin pressure sang tak an nei a, chu chu a tawn tlang mai thei lo. Fulham lakah an chak zo leh dawn lo emaw tih hnu minute 90+1-ah Bruno Fernandes chuan mikhual Pellistri siamsak atangin goal a thun nawlh a, he goal hi an chakpui zui ta a ni.
Manchester City leh United an chak
