Pathianni zan khan English Premier League 2025-26 season-a a vawi khat nan Manchester Derby khelh a ni a. Rawng pawl leh rawng sen ten chungnun an inchuhnaah rawng bawl (Sky-blue) an chungnung zawk a, City in 3-0 ngawtin United an hneh. Manchester derby-ah City in awlsam taka hnehna an chan laiin champion lai Liverpool chuan Burnley lakah harsa takin hnehna an chang ve thung.
Dan theih loh Haaland
Pathianni zana inkhel ngaihven hlawh tak; Etihad stadium-a inkhelah an match hnuhnung pahniha tlawm zawn Manchester City in chak ngei tumin thapui an thawh. Pep Guardiola team te hian ngam takin an mikhual United an hmachhawn. City hian United lakah bul an tan tha a, goal pawh an thun har lo. Khel tha tak Jeremy Doku chuan mawi leh fuh zetin ball a la lut. Doku hian a tum angin ball cross nghal thei lo mah se ball per let leh chu tha takin a chhawp tho thung. Doku ball chhawp tha tak hi Phil Foden chuan fing leh fim takin a tauh goal a, minute 18-na lekah hmahruaina goal a thun.
Hma takah goal an thun vangin City an phur a, an elpui lian United lakah inrintawkna sang zawk nen an inlan chhunzawm. City hian ball chang tam zawk mah se chawlhlawk hmain goal thun theihna hun tha an insiamchhuah thei bik lo. United pawhin an si phurh sut tum viau mah se awm ze neiin a khingpuite an nawr tlang hlei thei lova, si khat faia hnufual zawk chungin chawlhlawk an hmang.
Chawlhlawk hnu lamah City an khel tha lehzual a, goal pawh an thun belh thuai. Vei lam kil chep tak karah mawi leh fuh zeta ball an inpek kual hnuin thahrui ngah leh finishing tawih Erling Haaland chuan tha takin a tawp a khar a, minute 53-naah an goal hnihna thunin an hmahruaina a tizau. United laka an goal hnihna a thun hnu lawkah Haaland hian an goal thumna a thun zui leh nghal teuh viau. Haaland hian United si nghak Altay Bayindir tlan pelin, United defender bum leh bawk mah se a duh ang takin ball a pet thei bik lova, vanduai thlak takin goal post a pet per a, United an him hlauh.
Si hnih an phurh hnuin United in an si phuth sut ngei an tum a, an khingpuite an nawr na hle. An khingpuite an nawr lutuk vangin an chesual ta tlat thung. City hian hun remchang hmu fuhin an nawr let thut. Bernardo Silva ball pek fuh zet mai chu Haaland chuan a um fal a, chiai hauh lo, inringtawk zetin minute 68-naah goal kilah a pet goal a, an goal thumna a thun a, an hmahruaina a tihzau belh. Haaland hian EPL-ah vawi 101 khelin goal 90 a thun tling chiah a, EPL-ah game 101 atanga goal thun hnem ber a ni. City tan hian home match vawi 50 khelin goal 50 a thun tling chiah bawk. Kum 25 mi Haaland hian Norway tan a khelh hnuhnung berah goal 5 ngawt a thun a, United lakah goal hnih a thun zui leh zat a, club leh ram tan dan theih lohin a inlan mek.
Goal thum ngawt an thun hnuin Pep Guardiola-an champions league an khelh tur a thlir a, a player thate a hahchawlhtir a, khel tlem zawk an luhtir. United in an mualpho lutuk tur pumpelh nan goal thun ngei an tum a, City an nawr bet reng. United tan hian an forward thar Bryan Mbeumo chuan goal a thun teuh hle a, a hlap tha zet chu City si nghak thar Gianluigi Donnarumma chuan rang zetin a lo dang hman a, a team thar a chhan him. United hian an khingpuite nawr bet viau mah se hun tawp thlengin goal an thun thei lo va, an elpui lian City lakah 3-0 ngawta tlawmin an mualpho zui ta a ni.
United lakah an chak vangin Manchester United hian khelh 4 atangin hnehna an chang a, tlawm zawkah vawi hnih tang tawh bawkin point 6 an hmu a, pariatnaah an awm. Hetihlai hian United hi khelh li atangin vawi khat chiah an la chak a, tlawm zawkah vawi hnih tangin draw vawi khat an nei tawh bawk. Khelh li atanga point point li hmuin 14-naah an awm mek thung.
Ka thiam loh a ni – Amorim
An elpui lian Manchester City lakah an mualpho hnuin United manager Reuben Amorim chuan an chak lo chu a mawh a nih thu a sawi. Sporting CP a hnuhma nei tha tak Amorim hian beiseina sang tak nena latu EPL club ropui Manchester United hma a sawnpui hleithei lo. Erik ten Hag a thlak hnuah United hi EPL-ah vawi 31 kaihruai tawhin vawi 8 lek a chakpui a, hnuhma a nei chhe hle. 2024-25 season ah phei kha chuan 15-na hial a nihpui. Season tharah beiseina thar nen bul tan bawk mah se vawi li an khelh meuh chuan 14-naah an awm leh der tawh. Heti a nih vang hian Amorim hian duhkhawp a hlawh lo sawt viau. Red Devils hian inrinni zan khian Chelsea an hmachhawn zui leh nghal dawn a. Chelsea lakah an tlawm zui leh a nih chuan Amorim hian ban a tawh rinna lian tak a awm hial tawh a ni.
Liverpool an vannei
Pathianni zana inkhel dangah champion lai Liverpool chu Burnley lakah an chak zo lo teuh hle a, hun pek belha penalty an hmuh hmangin vanneihthlak takin an chak thei hram chauh.
Turf Moor a lenglut Liverpool hian goal an thun thei lo reng a, minute 84-naa Lesley Ugochukwu hnawhchhuah a nih hnu pawhin goal an la thun thei lo zel. Hun pangngaiah goal an thun thei lova, hun pek belh tawp dawn thlengin goal an la thun thei lo. Hun pek belh tawp dawnah erawh an vannei ta nge nge a, penalty an hmu. He penalty hi Mohamed Salah chuan minute 90’+5 naah a pet goal a, chakna goal a thun a, campion zia an chhuah. He penalty goal hmang hian point thum hlu tak an hmu a, season tharah hnehna chang vekin hmahruaitu an ni chhunzawm.
Manchester khaw rawng chu a PAWL
