Manchester United leh Arsenal an tlawm

Inrinni zana English Premier League khelhah team lian pahnih Manchester United leh Arsenal an tlawm a, table-ah hmahruaitu a danglam nghal bawk. United hi Old Trafford-a an mikhual AFC Bournemouth lakah si thum fai ngawtin an tlawm a. Hmahruaitu Arsenal hi Villa Park-a an khingpui Aston Villa lakah an vanduai ve thung.
An mualah United an mualpho
November thlaah thla dang aiin United an chetha a, award pawh an dawng neuh neuh. ‘Manager of the Month’ ah Erik ten Hag thlan a ni a. Harry Ma-guire chu ‘Player of the month’ ah thlan a ni ve bawk. |ha takin November thla khar mah se December ah erawh an che pui lo viau thung a, inrinni zanah an khelmual Old Trafford-ah ngei nasa zawkin an mual pho a, 15-naa awm mek AFC Bournemouth lakah si thum fai ngawtin an tlawm.
Old Trafford a lenglut Bournemouth hian bul an tan tha viau a, minute nga na lekah hmahruaina goal an thun hman. United in ball a clear fuh tawk loh vangin Bournemouth hian hun remchang an hmu a, rang zetin an khingpuite an nawr tlang. Fuh taka ball an inpek hnuin Dominic Solanke chuan lei hrulah fuh zetin a pet goal a, hmahruaina goal a thun.
Hma takah goal an thun vangin an phur viau a, inrintawkna sang zawk nen an inlan zui theih phah bawk. Chawlhlawk hmain goal an thun belh teuh hle a, Solanke chuan goal post a pet per a, United an him hlauh. United tan hian defender Harry Maguire an a tauh goal teuh viau bawk a, a tauh tha tak chu Bournemouth si nghakin a lo nam chhuak hman hlauh a, an team a chhanhim.
Chawlhlawk hmaa goal dang a luh belh theih loh hnuin chawlhlawk hnu lamah Bournemouth an khel tha leh zual a, goal hnih an thun belh. Second half-ah hian mikhual team in goal an thun belh leh thuai a, Philip Billing chuan minute 68-naah Tavernier ball vawrh luh tha tak chu fuh zetin a tauh goal a, an goal hnihna a thun.
Si hnih an phurh hnuin United in an si phurh sut ngei tumin tan an khawh a, goal thun tur khawpin an insiamtha thei chuang lo thung. Goal thun an mamawh em em laiin goal an chhuah belh ta zawk. Minute 73-naah Tavernier corner pet tha tak chu Marcos Senesi chuan far post-ah chiang zetin a tauh goal a, an goal thumna a thun.
Team lian United lakah goal thum ngawt an thun hnuin Bournemouth an khel tha chhunzawm a, goal khat dang an thun belh leh. Dango Ouattara pet goal chiang tak chu VAR rawn a nih hnuin hnawl a ni a, United an mualpho thui lutuk loh phah. Tichuan, goal dang luh belh lovin inkhel a tawp a. Manchester United chu an mualah ngei si thum fai ngawtin an mualpho zui ta a ni.
An mualah an tlawm leh tak vangin United an hniam duai duai a, he thu buatsaih lai thleng hian paruknaah an awm mek a, hniam lehzuala tlahniam thei dinhmunah an ding mek bawk. United hian khelh 16 atangin point 27 an hmu a, an chunga awm Tottenham nen an point hmuh zatin inang mah se United hian Spurs aiin an khel tam zawk thung. An hnuai chiaha awm Newcastle United nen point khat chiahin an inthlau mek bawk.
Team lian hneh thei Aston Villa
Inrinni zana inkhel ngaihven hlawh takah Aston Villa chuan Villa Park-a an mikhual Arsenal chu McGinn goal thun hmangin an hneh a, pathumna an luah nghet. Aston Villa hian champion lai Manchester City an hneh hnu lawkah hmahruai mektu Arsenal an hneh zui leh nghal zat a, champion cho ngam an nihzia chiang zawkin an lantir.
Aston Villa hian an chung chiaha awm Arsenal lakah bul an tan tha viau a, inkhel tan atanga minute sarihna lekah Bailey siamsak atangin John McGinn chuan hmahruaina goal a thun. Hma takah goal an thun vangin inrintawkna sang zawk an nei a, phur leh zual zawkin an mualah an inlan zui theih phah.
Hma taka goal an chhuah sut tumin Arsenal in tan an khawh zui nasa hle a, hun tha nei bawk mah se an chhawr tangkai zo lo a, an tlarhma hriam loh rual tum a ni teh tlat. An hun tha an hlah fo hnuin Arsenal in hun tawp dawn hnaih lamah tunlaia goal thun thei Kai Havertz hmanga goal thunin an siphurh an sut. Havertz goal thun hi VAR hmanga en nawn a nih hnuin hand ball ah pawm a ni a, Arsenal goal chhuhsak an ni a. Inkhel pawimawh takah uiawm takin Gunners hi an tlawm phah ta a ni.