Premier League club lian Manchester United chuan si nghak thar an nei a, Cameroon si nghak Andre Onana chu Inter Milan atangin an la a, kum nga daih contract an ziahpui.
United leh Inter Milan te hi Onana manah £47.2m in an inrem a. United hian £43.8m an pe phawt ang a, a khelh that dan a zirin £3.4m an belh leh leh ang. Kum 27 mi si nghak tha tak Onana hi kum nga daih contract an ziahpui bakah a contract hi kum khat dang pawhsei leh theih turin thu an bilh tel bawk.
United manager Erik ten Hag leh an si nghak thar Onana hi Ajax lamah an lo inhrawn reng tawh a, Ajax hi Netherlands tualchhung league sang ber Eredivisie-ah vawi thum an champion pui. Kum 2022 July thla khan contract hmang zovin Ajax a chhuahsan a, free transfer in Inter Milan a zawm. Inter Milan tan hian Serie A-ah vawi 24 a khel a, clean sheet vawi riat a nei. Inter Milan hi Serie A-ah pathumna an ni a, champions league final thleng mah se Manchester City lakah an vanduai hlauh thung.
United in David de Gea hmunruak luah tura an lak luh Onana hian club tan vawi 255 khel in, clean sheet vawi 104 zet a nei tawh a. Hetiang zat game-ah ani aia clean sheet nei hnem an awm lo. Club tan chetha viau mah se World Cup 2022-ah khan Cameroon coach Rigobert Song duhsak a hlawh zo lo tlat thung. Coach nen an inhmuhthiam loh vang hian December 2022 khan International football a chawlhsan ta ri ngawt.
Onana chuan club ropui Manchester Uni-ted-ah Ajax-a a pu hlui Erik ten Hag nen an thawk dun leh thei tur chu phurawm a tih thu a sawi a. United a zawm thei chu atan chawimawina a nih thu a sawi bawk. United tan chona thar hmachhawn a chak tawh thu a sawi tel a. United pawhin si ngak thar tha tak an nei fel thei ta chu lawmawm an tih thu an sawi ve bawk.
ManchesterUnited in Onana an la lut
