Mane goal-in Afcon 2025 khel turin
hmunhimah Senegal a hlangkai
Lilongwe khuaah mualneitu Malawi nen goal awm loa inhnehtawk mai thei dinhmuna an din tawh hnu hun pekbelh minute rukna a kal mek laia Sadio Mane goal khat tihluh hmangin Senegal-in point thum an hlawhchhuak hram a, khelh hnih hmabak la nei chungin 2025 Africa Cup of Nations (Afcon) khel turin an tling.
Liverpool striker hlui Mane hi Saudi Arabian club Al Nassr tan a khel mek a, Arab lama a a inphumbo tak avangin a thawm hi hriat tur a tam ta lo deuh a ni.
Teranga Lions hi interim manager Pape Thiaw hnuaia khel mek an ni a, a ho hian Afcon qualifiers kal mekah vawihnih an chak zawn a, hmunhimah an chuangkai ta a ni.
2021 Afcon champion Senegal hi tunthla tir lam khan hun rei tak an lo chhawr tawh coach Aliou Cisse nen an inthen a, manager lailawk hnuaiah an chefuh ta phian rih a, Group L-a point 10 nei chungin West Africans ve bawk Burkina Faso nen an group atangin an tling.
Morocco rama 2025 Nations Cup khel tur hian Angola, DR Congo leh Egypt pawhin khelh hnih la nei chungin an dinhmun an sawhnghet ve tawh bawk.
Thawhlehni inkhel dangah reigning continental champion Ivory Coast chu rin loh takin Sierra Leone mualah sikhat faiin an mualpho a; Sudan laka tlawm Ghana pawh tla thei dinhmunah an ding nghet hle tawh!
Black Stars hian khelh li-a point hnih chauh thawkchhuakin Group F-ah pathumna an luah chhunzawm a, an tlin leh tlin loh chu midang inkhelah a innghat tawh a ni.
West African team tha thin hian thla thara an tum leh tur pahnih Angola leh Niger hi hneh ve ve pawh ni se point sarih hum vang tawh Sudan chu an hmabak pahniha an tlawm ve ve loh chuan Ghana tan 2025 Nations Cup khel tura tlinna kawng a kaw tawh chuang lo!
Africa khawmualpui champion ni ngun ber Egypt pawh a vawiriatna atana title chuh leh thei turin an tling a; Thawhlehni zan qualifiers inkhel dangah an thiampuipa Mohamed Salah tel loin Mauritania lakah 1-0 hnehna an sualchhuak a, Group C-ah match li khelin vawili an chak.
Nouakchott khuaa Pharaohs chakna goal awmchhun hi minute 85-a Ibrahim Adel tihluh a ni.
Inkhel dangah sihnih faia mualneitu Tanzania hneh chungin DR Congo pawhin an tum ram an thleng.
Kumin kumtir lama khelh 2023 finals-a palina hauh pha Leopards chakna goal hnih hi hun tawp hnaih lama Meschack Elia tihluh ve ve niin, goal khat mah chhuah loin Group H match li an khelh tawhah an la chak fai vek!
South Sudan muala 2-0 hnehna nen Uganda pawhin tlin an hnaih ve kuar tawh a, mahse, Group K inkhel dangah 1-1-a Congo leh South Africa an inhnehtawk avangin chiang turin thla thar an nghah leh phawt a ngai dawn.
Afcon title vawinga la tawh Cameroon leh Algeria pawh Thawhtanni khan chakin, North Africa lama team 24 inelna tur khawmualpui huap tournament lian khel turin ticket pek an ni ve tawh bawk.
Qualifiers round hnuhnung pahnih hi thla thara khelh tur a ni a; 2025 Nations Cup chu nakkum December ni 21 atanga khelh tan tur niin, kum 2026 January ni 18-ah final an khel ang.
Afcon 2025 khel turin ram pariat an tling tawh a, chu’ngte chu – a thlengtu Morocco bakah Algeria, Angola, Burkina Faso, Cameroon, DR Congo, Egypt leh Senegal-te an ni.
Mane goal-in Afcon 2025 khel turin hmunhimah Senegal a hlangkai
