Middle East-a housemaid tura tirh, buaina tawk zui ta leh jail hial tang ta te leh a hmuna anmahni buaipuiten manganga an kohna chu chhang turin Mizoram sawrkar an phur tih Congress Thalai chuan an sawi.
Congress Thalai Hqrs. thuchhuak chuan, Mizo tleirawl, inbumna hmanga Dubai United Arab Emirates-a housemaid tura sawrkara kum la tling lo, agency-in passport dik lo leh dan dik taka immigration license document pawh nei loa thawn an nih hnuah an tum loh tawpa thla 7 jail-a hrehawm taka tantir an nih chanchin lungchhiat thlak tak hriat tur a awm chu pawi a tih thu a sawi.
He thilah hian 2023 September 4 khan FIR thehluha ziahluh niin, sawrkar atanga engmah hmalakna a awm zui loh avangin Dubaia-a hna thawka awm,, petroleum geologist Lalchhuanzela chuan kumin Febuary 12 khan Home minister Pu K Sapdanga hnenah hma la tura ngenna a thlen a. Phone hmangin adviser to chief minister Dr KC Lalmalsawmzauva pawh bia-in, a ni hian chief minister a hrilh nghal a. Hei bakah hian Guwahati Mizo Welfare-in hmaichhanah chief minister Pu Lalduhoma chu hma laksak turin an ngen a. Lalchhuanzela hian a biak theih leh hma la thei tura a ngaih hrang hrang bekualin ZPM-a hotu, Serlui biala ding tura ngaih Pu Jimmy Laltlanmawia hnenah Whatsapp leh Facebook messenger hmangin hrilh a ni bawk tih Congress Thalai hian a sawi.
‘Hetiang khawpa ngenna tam tak thlen a ni chunga hmalakna awm miah lo hi, ZPM hi ram rorelna chelh tlakah kan ngai loa. Chief minister berin agency-te thil tih chu dan lo a ni tih hrereng a, licence an nei lo tih hre bawk chunga a ngaipawimawh lo lutuk leh Assembly House-ah pawh thilsual titute hum zawnga thu a sawi duh hian ram mipui himna a ngaihpawimawh loh zia a tichiang hle a. Harsatna tawkte chhungkua bakah Mizoram mipui rilru a ti na a ni,’ a ti.
Harsatna tawkte tana Lalchhuanzela’n a hna leh a hun bakah sum tam tak senga a lo buaipuina chu lawmawm a tiin a chhuang a, tleirawl harsatna tawkte him taka an chhungte nen an inhmu leh thei a lawmpui tih Congress Thalai hian a sawi bawk.
‘He thilah hian thil dik lo titute an phu ang ngeia hrem an nih theihna’n hma la turin Mizoram sawrkar a phut a, hemi atana thil tul leh tangkaina a awm a nih chuan Congress Thalai chuan theihtawpin a pui dawn a ni,’ thuchhuah chuan a ti.
Mangangte kohna chhang turin Cong Thalai-in sawrkar a ngen
