Mizoram thalaite hamthatna tura MNF-in election manifesto-a a tarlante chu kum 4 chhungin sawrkarin a tihlawhtling vek tawh niin MNF Thalai vice president Zodinpuia chuan a sawi.
Thuthar thehdarhtute hnen a sawi danin Zodinpuia chuan, 2018 election manifesto-ah MNF party-in Mizo thalai leh zirlaite hmasawnna tur point 11 a chhawpchhuak a. Hei hi kum 4 sawrkar chhungin tihhlawhtlin vek a ni tih a sawi. Mizoram sawrkar chuan thalaiten zirna leh an thiamna hmanga hlawhtlinna an neih theihna’n nasa takin hma a la a, hemi atan hian Labour Employment, Skills Development & Entrepreneurship department leh Mizoram Youth Commission te thuam chakin, Mizo thalaite hmasawnna turin theihtawpin ke a pen tih a sawi a ni.
Thalai hna zawng, employment exchange-a in register turten awlsam zawka online hmanga an in register theihnana Employment Exchange Portal – EMPEX buatsaih a nih thu te; LESDE department hnuaiah Recognition Prior Learning Programme kalpuiin, training provider 42 leh accredited traning center 77 an awm a, job placement pawh 6668 neih a nih tawh thu te a sawi.
Aizawl, Lunglei leh Siaha ah Govt ITI neih sa bakah Champhai, Serchhip, Thingdawl leh West Phaileng ah te ITI thar dinna tur building sa mekin, hengag hian trade 23 zir theih a nih thu a sawi.
Kum 2021 atangin Mizo thalai thiamthil neiten an thilsiam chhuah hmanga intihsiakna leh intawhkhawmna – PUM (Innovation Fair) chu Mizoram sawrkarin buatsaihsakin, sumfai lawmman pek an nih thu te; ITI atanga zirchhuakten bul an tanna turin KAWTCHHUAH (Start-Up Fair) buatsaih tan a nih thu te; Mizo thalaite World Skills Competition-a tel turin inbuatsaih mek a nih thu te a sawi bawk.
Mizoram Youth Commission hnuaiah hna zawng mek leh hnathawktu tur mamawhten awlsam taka an inhriatpawh zung zung theihna’n on-line job portal siam a nih bakah Aizawl leh district dangah UPSC, engineering leh medical lam beih tumte tan offline coaching neihpuiin zirlaite a sponsor a; hna dang hmachhawn turte tan coaching hi neihpui niin, infiamna leh rimawi hmanga eizawn theihna te pawh thalaite tan kawng a buatsaih sak dante a sawi a ni.
“Chief minister Pu Zoramthanga kaihhruai MNF sawrkar hian Mizo thalaite hmasawnna turin nasa takin hma a la a. Eptu party leh mi thenkhat, sawrkar hmalakna sawi bawrhban tuma hmanhlelte avang hian MNF chuan Mizo thalaite hmasawnna tura ke a penna hi chawlhsan a tumlo a, theihtawp a chhuahzel dawn a ni,” MNF Thalai vice president hian a ti.
Manifesto-a thalaite hamthatna tura tarlante tihlawhtling vek – MNYF vice president
![](https://theaizawlpost.org/wp-content/uploads/2023/03/mani-1024x471.jpg)