Inthlan dawn apianga political party ten sawrkarna an siam huna ram kaihhruai an tum dan tarlanna ‘Manifesto’ chu inthlang mai tawh tur kan nih avangin party hrang hrangten mipui hriatturin an phochhuak ta sap sap a. Political party tinte manifesto hi a nih dan tur ang taka hlenchhuah a nih phawt chuan ramin nasa taka hma a sawn phah theihna tur vek a ni. Chumi awmzia chu, sawrkarna siamtu political party-in an party manifesto hmang lovin party dang manifesto hmangin ram kaihhruai ta se, ramin a thatpui tho dawn, tihna ni awm e.
Ram changkanga an kalpui thin, manifesto thlir chunga ‘eng party manifesto hi nge kan thatpui ber ang’ tia duhthlanna fel tak nei chunga vote thlak ang hi kan ramah hi chuan kan la hlat hle niin a lang. Hei hi a chhan chu, ram thanglai mek kan ni a, ram changkang tawh (developed country) dinhmun nena khaikhin theih pawh a la ni chiah lo; ram changkang tawhte tihdan kan la zir chho mek chauh a ni.
Tunhma ai chuan manifesto pawh mipuiin an ngaihven dan a dang ta deuh a, political party-te pawh an fimkhur phah a, sawrkarna an siam huna an hlenchhuah leh theih loh tur ang chi an fawmkhawm chiam tawh lo niin a lang.
Sawrkar kan hrawn tawh zawng zawngte khan Mizoram hmasawnna turin hna an thawk vek a, an thawh hlawk dan erawh a inang lo mai a ni. Chutiang bawkin, Manifesto tha tak tak an nei vek zel a, an hlenchhuah dan pawh a inang lo mai a ni.
Thil pakhat, eng sawrkar mahin a la tihhlawhtlin theih miah loh a awm a, chu chu ‘corruption tih reh’ hi a ni; hei hi chu khawvel awm chhunga reh hmak lo tur chi a ni ve hrim hrim. Sawrkar thar pawh lo piang se, corruption hi chu an ti reh dawn lo a, tih nep theih erawh a ni. Chu chu thil harsa em em pawh a ni lo va, system tha tak kan neihsate hi a nihna tur anga zawm mai hi hi a tawk a ni. System anga kal hi manifesto zawng zawng hlenchhuah theihna leh a khaikhawmna a ni mai awm e.
Manifesto leh a behbawm…
